[318] MILITAR IN MARINA
LINO TIMILLERO – CONISTON – Nuovo Galles del Sud (AUSTRALIA)
Cuando che me capita de parlar dialeto, no me tiro indrio. Pì s-ceto chel xe, mejio xe!!! Ma come, mi dovaria tirarme indrio, e no parlare come che go, inparà da me mama e me fradei co jero picinin?! No posso dire anca da me popà parché, tra Svissara prima e Francia dopo par le stajion de le barbabietole da zucaro, el jera casa solo che par le Feste de Nadale.
Me ricordarò sempre cuel che me contava el me paesan Gastone!!! La figura chel ga fato cuando chel jera ndà Militare. In Marina!!! Vinti cuatro misi!!! Ghe tocava ndare in Marina parchè, ndove chel laorava, tuti i aprendisti scomiziava a laorare a 16 ani bisognava che i ndasse in Marina! El mese de Novenbre del 1962 ghe gavea tocà nare a Venessia.
La Cartolina de partensa la ghe jera rivà par tenpo! Ala Stazion del Treno, el gavea caminà drio ala Ferovia. De casa, el stava sol Caselo dela Ferovia parché so popà el fasea el Caselante ala Fracanzana. Co ghe jera la Nebia, anca da casa mia, (Borgolecco), se sentiva i s-ciocchi dei petardi che el Caselante el metea sui binari dela Ferovia. Par farghe savere al Machinista del Treno che la Stazion la jera poco distante! E co ghe xe la Nebia zò ala Fracanzana, la xe ncora pì fissa che no fa in piassa a Montebelo!!!
Gastone el gavea da ciapare l’acelerato dele dò e un cuarto par Vicenza. Là el gavaria ciapà el Direto fin a Venessia. In Stazion el se ga catà con Menego. I jera nà scola nsieme. Dal maestro sicilian! Fin ala cuinta! Dopo, Gastone el jera nà suito a laorare da on parente de so popà, e Menego el jera nà scola a Vicenza. E dopo, uno laorava da na parte e chel altro da naltra parte. I se gavea fato micizie difarenti. Menego el nava al Cinema a Arzegnan cola bicicleta. Gastone el nava a Tarossa e a Roncà co la moto a zercarse le morose! Ogni tanto i se vedea in giro: come vala; te gheto catà la morosa…e conpagnia bela… Fin che i se ga catà ala stazion de Montebelo!!! Ghe tocava nare tuti du in Marina!!! I saria stà Coscriti, da far la Festa co saria rivà la so ora, sui Vinti ani. Ma ghe tocava nare in Marina. A disdoto ani!!! A Venessia, bisognava nare fin al Arsenale. Gastone el ga dito suito che lu el savea la stada ?! “Ma cuale strada” ga dito Menego! “cuà ghe xe acua dapartuto!!!” Vaporeto fin a San Marco. A pié fin al Arsenale. Menego el vardava in giro: le Cese, el Canpanile… come on toseto!! Al Arsenale ghe xe stà dito che ghe tocava spetare che rivasse tuti cuei de leva che doveva rivare in te on par de ore. Co jera ora, i saria ndà ala Stazion da novo par nare a La Spezia, in Liguria. (par chi che no lo saveva!) E cussì la xe stà: tuti sentà so on barcon discuerto, pian pianelo, co l’acua che se podea tocarla cola man. De San Marco se podea vedare anca el Canpanile parché so la Piassa ghe jera luce dapartuto! Ala Stazion, i xe stà messi tuti drento a un vagon che de pì veci no podea esserghene! Tuti schizzà e sentà sui sentarini uno davanti a chelaltro, sia de cuàche delà. Ghe jera tusi da tute le parti: Vicentini, Trevisani, Padovani e Veronesi. Anca Furlani, ma chissà da ndove. E Triestini! Ma nissun parlava Talian. No ghe jera bisogno!!! I se capiva istesso. I parlava, se diria desso, on dialeto ‘Interprovinciale’!… Ma no a La Spezia!!!…
Dopo essar stà in giro tuta la note, co tre ore da spetare a Bologna. Dopo essar nà vanti a tochi e boconi sui monti dale parte de la Garfagnana, el vagon xe rivà a La Spezia! Ale 10 dela matina!!! Là ghe jera du Marinai in divisa bianca. Ala bona, i marinai in divisa bianca i ga inscuadrà tuti par tri e i li ga portà fin ala Caserma. Rivà in Caserma, a tuti cuei tosati, ghe xe stà mostrà ndove che jera la Mensa, el Spacio, i gabineti e su fin al Dormitorio. Prima de nar magnare a mesojorno, i xe stà messi a scuadre de dodese: dodese par tola. Xe stà fata la conta par vedare chi che saria stà i dù che ghe tocava lavare i piati e la pegnata del magnare! Par fortuna no ghe ga tocà a Gastone e a Menego! Ala sera, stessa roba, e anca lora, Menego e Gastone i la ga passà lisia!!! Finio de magnare, i se ga messi a far du passi sol ‘Quadrangolo’ ndove che vignea fate le Marce. El Spacio el jera là in fondo e Gastone el volea conprarse le sigarete. Ghe xe ndà vizin on Marinaio co la Divisa Blu chel ghe ga dimandà se i volesse conprare sigarete? Na ‘steca’ par 4.000 lire. De contrabando: sigarete Mericane. No grasie. I jera lì par rivare al Spacio e ghe riva vizin on Prete. Grando, cola Tonega bianca da Prete. “Buonasera ragazzi, io sono il Cappellano Militare, Don Mariano. Siete arrivati in molti oggi. Voi due da dove siete?” Gastone el dise: “ Nialtri vegnemo da Montebello Vicentino.” E Don Mariano:” Ma là non c’é il Mare!” “Lo savemo” dise Menego,” ma no savemo gnanca noare!!!” E Don Mariano: “Ah, per quello, imparerete subito.” El va vanti disendo: “Scusate se ve lo chiedo, ma, da bravi ragazzi, mi dovete dire la verità: bestemmiate anche voi due, come tutti i Veneti?” “ Mi no!” dise suito Menego. “Mi – dise Gastone – tiro calche saraca ogni tanto, se calchedun me fa inrabiare.” “Bravi, bravi, – fa ancora Don Mariano -, è la prima volta che andate fuori dal Veneto?” Gastone el dise che lu el xe stà fin a Vercelli dai so Zii e Menego el conta chel xe ndà fin a Torino con so mama a catar so zia Suora. Alora Don Mariano dise:” E l’Italiano? Non lo avete mai parlato?” Menego e Gastone i se ga vardà in facia! Suito dopo Menego el dise: “El me scusa Don Mariano, ma lu vorissilo che mi me metesse a parlare in lingua co Gastone che semo nà scola insieme fin da picinini?” Don Mariano, co la Tonega bianca da Prete dela Marina Miltare, el xe restà a boca verta! Ma el xe ga messo suito a dire: “No, con lui puoi parlare il vostro dialetto. É con me che dovresti parlare Italiano! Così ti potrei capire meglio! E sarà con i vostri superiori che dovrete parlare Italiano. E prima lo farete, meglio sarà per voi!!! Ma ora vi lascio, Pace e Bene.” Gastone el xe ndà casa suito, pena pasà la Visita: solo du denti in boca! Menego el ga dovesto parlar Talian!!! A Catania no se podea far de manco!!!
(Lino Timillero Coniston 12-2-2018 Revised as Linus Downunder 22-4-2018)
Foto: La stazione di Montebello negli anni 50 del Novecento (rielaborazione grafica Umberto Ravagnani).
Umberto Ravagnani
Se hai FACEBOOK e l’articolo ti ha soddisfatto metti MI PIACE 
Oppure lascia un commento qui sotto…
L’uomo ha convissuto per molti secoli della sua storia con il buio e la semioscurità; solo tra la fine del Settecento e l’inizio dell’Ottocento si cominciò ad illuminare le strade delle città e dei grossi centri urbani con le lampade a olio e a petrolio; ma bisogna arrivare al Novecento per un’applicazione economicamente conveniente con l’energia elettrica per l’illuminazione e l’industria. Il nuovo sistema, basato sull’elettricità, fu reso possibile dal susseguirsi frenetico di ricerche innovative che negli ultimi decenni dell’800 era culminato con la scoperta di nuove sorgenti elettriche, prima tra tutte quella dell’arco elettrico: la luce intensa e incandescente ottenuta con il filamento al carbonio raggiunse un livello molto elevato. Le caratteristiche formali e tecniche della lampada fine ottocentesca di Edison resteranno pressoché le stesse presenti nelle lampade che ancora oggi utilizziamo, anche se oramai il passaggio alle lampade a led, molto più efficienti, le sta rendendo obsolete. L’affermarsi della luce elettrica operò una vera rivoluzione in senso pratico, annullando la differenza tra giorno e notte, con l’apporto di un grandissimo potenziale di creatività.