BORGOLECCO STORY (7)

[268] BORGOLECCO STORY (7)

LINO TIMILLEROCONISTON – Nuovo Galles del Sud (AUSTRALIA)


Β« E xe rivΓ  lora de parlar dei fossi! Drio le strade ghe jera on fosso de cuΓ  e on fosso de lΓ  dale parte dela strada. Se vΓ¨ sola Via Borgolecco, ncora desso, co se riva ala Via Monte Grappa, se vardΓ¨ la casa de soto, se vede na renghiera ntra la strada e la casa. Stiani cuela la jera la casa de Plinio. La renghiera la xe lΓ  parchΓ©, ncora desso, lΓ¬ ghe xe el fosso! Stiani, ghe jera el fosso sensa renghiera! Da li, fin ala curva dela Mira, ndava vanti cuel fosso. E anca da chel altra parte dela Strada. ZΓ² fin ala Mira anca cuelo! Desso la Via Borgolecco la se ciama cussΓ¬ par tuta la β€˜Strada Fonda’ de na volta.
El fosso so la man drita el se vede ncora ndove che ghe xe la stradeta che va zΓ² dai Testina. PΓ¬ vanti ghe xe la β€˜Pista Ciclabile’. LΓ  se vede de novo el fosso sola man zanca, chel va vanti fin ala curva dela Mira! Co capitava cuei temporali bruti, da ciapar paura, le β€˜Imprese Agricole’, le mandava su par aria i Petardi che ghe dava el β€˜Consorzio’ par ronpere le nuvole da tenpesta che ghe jera su par aria!! I sc-iantisi i fasea paura. Calche volta i sonava anca la canpanela del Castelo!!! Lora scomiziava a piovare!!! E piovea che Dio la mandava!!! Se npienava i fossi. Lacua la corea dapartuto. La nava sola strada. Ma, depΓ¬ de tuto, lacua la nava a finire sui canpi!! ParchΓ© desso, co fa bruto tempo, se ferma lacua in giro par Montebello? Da calche parte la vΓ  drento ale cantine e i soto-casa. Acua dapartuto!!! ParchΓ©, par far su le case, se stΓ  sarΓ  i fossi. E par vedere che le strade, de cuΓ  e de lΓ  le ga i marciapiΓ¨ fati su ben, coi tombini par l acua. Par sarare i fossi, se stΓ  mese zo le tubazion drio le strade. Dopo se stΓ  sarΓ  su tuto e par sora ghe xe i marciapiΓ¨. Dala Canonica fin ala Mira, cuando che no ghe jera gnanca na casa, ghe jera on fosso. Che lo traversava ghe jera solo la stradeta del Cimitero e na cavezagna che ndava dai Testina. Da chelaltra parte dela strada, el fosso scomiziava on pochetin pΓ¬ vanti de ndove che stava Gianni Verlato. Anca cuelo lo traversava on paro de cavezagne par nar sui canpi. PΓ¬ vanti ghe jera la casa del ovarolo col porton. LΓ¬ el fosso el jera cuerto. E suito dopo el jera verto fin ala Mira anca cuelo! E piante de Platani dale parte dela strada. Ve ricordeo??? Cuando chel pioveva forte, l acua la nava via pai fossi e, se i fossi se npienava, la nava fora sui canpi!!!
Desso xe tuto belo. On bel Viale Verona! Gnanca on Platano. Coi bei marciapiè parte par parte!!! Co piove forte, ma forte che Dio la manda, ndove vala a finire l acua??? La vien fora dai tonbini e la và in giro par le strade!!! Ndove che xe basso la inpiena tuto: cantine, soto-case, soto-pasai, tuto pien de acua! Nialtri tusi de la Via Borgolecco, gavivimo parfin catà ndove che ndava a finire el fosso dela Stradela dele Carpane! Da ndove che ghe xe el Capitelo, se va vanti on pochetin. Co finisse cuel chel jera lorto dele famejie che stava lì, scomiziava el fosso. El vignea zò da ndove che desso ghe xe Via Pieropan. Là la mura la fasea canton e la nava su dala parte dela Vale. Propio sora al fosso, jera stà fato on cesso. L acua vignea zò dal monte. Cuando che pioveva lacua portava via tuto! Ndove che stava Silvano, el fosso el jera sarà: da poco pì vanti del cesso fin ala Via Borgolecco e zò, pasà el Capitelo. El fosso dela Stradela el jera fondo cuasi on metro. Pien de erbazze e de ortighe. Ala casa de Genio el Sacrestan, vizin ala Cesa, el fosso el jera stà cuerto naltra volta. Lì xe ndove che finisse la Stradela. Da na parte ghe jera el canton dela mura dela Vila e da chelaltra i Spoliatoi de cuei che zugava le partie de Calcio co la U.S.Montebello. Ghe jera i Cessi e i Bagni par i zugadori che i gavea da canbiarse. Dala parte del Canpo da Calcio ghe jera anca i cessi par cuei che nava vedere le Partie. Dala parte del Canpanile, el fosso el jera verto pena passà l Oratorio. Poco pì vanti ghe jera el porton par nare sol canpeto ndove che i fasea el Cinema alaperto. Fosso verto par on diese metri fin ala Canonica. Fosso sarà ncora davanti ala Canonica e dopo verto fin al Cimitero. Cossa vol dire? Lì rivava zò anca lacua dela Via Vaccari! Cuela la jera ncanalà soto ai tonbini! Ghe volea poco par capire che el fosso dela Stradela el pasava propio vizin al Oratorio!! Soto tera, dala Stradela a cuel che desso se ciama Viale Verona.
Na volta, Silvano e mi, jerimo drio metarse dacordo par catarse on paro de Pile e nar a vedare se se podea pasare dala Stradela fin al Canpanile pasando drento ai tonbini! Fortuna che no ghemo catΓ  le Pile!!! Zercando de saltare dala rete che jera drio al fosso par nare sola Stradela e far pΓ¬ presto a nar casa, me go scavezΓ  el brazo! L’asola de na scarpa la se gavea ciapΓ  sol filo spinato. Co son saltΓ  , nveze de rivare sola Stradela, son cascΓ  drento al fosso e me son alzΓ  sΓΉ col brazzo, cuelo zanco, piegΓ  come el bigolo!! Fasevo la IIIa lementare, col maestro Perticone. Vol dire che gavevo 8 ani! Co so ndΓ  sΓΉ dal fosso, no me ricordo se xe stΓ , Silvano o Luigi, el xe corso casa a ciamare me mama. Mi me tegnevo sΓΉ el brazzo storto come el bigolo. Me mama xe rivΓ , cola bicicleta da dona, che mi gavevo zΓ  caminΓ  fin ala Via Borgolecco. La me ga vardΓ  el brazzo! La me ga da na s-ciafa sol de drio! La me ga messo sentΓ  sol manubrio dela bicicleta e la me ga portΓ  al Ospedale! El Dotor Crivelaro, a chel tenpo lΓ , el nava al Anbulatorio del Ospedale dale do ale zincue. L Ospedale el jera ndove che desso ghe xe la Casa di Riposo San Giovanni. Co semo rivΓ  lΓ , na Suora la xe ndΓ  a ciamare el Dotore. El Dotore el me ga vardΓ  el brazzo. El ga fato ciamare l Infermiere. Ntanto jerimo na drento al Anbulatorio. L Infermiere se ga sentΓ  so na carega. El Dotore me ga dito de sentarme sui zanoci del Infermiere. Senza che me inacorzesse, l Infermiere el me tignea streto. Le me ganbe ciapΓ  nframezo ale sue! Vizin ghe jera na tola. El Dotore el me ga meso el brazzo sola tola. CussΓ¬ senza che me inacorzese, el me ga ndrizzΓ  el brazzo! El gavea zΓ  finio prima che mi me metesse a pianzere!! Xe rivΓ  la Suora co na bacinela de acua. La gavea na steca de legno fin e on scartozzo de na polvereta bianca. La ga smissiΓ  la polvereta col acua e la ga messo na garza drento ala bacinela. Mi, vardando cuel che i jera drio fare, go finio de pianzere. Fin che l Infermiere me meteva la steca de legno soto al brazzo, la Suora me meteva coton par sora. Dopo la se ga messa a pasare la garza bagnΓ  col gesso (la polvereta bianca) intorno al brazzo. Sora al coton e torno via, fin ala man. La me ga assΓ  fora i dei dela man col deon infassΓ  torno chel vanzava fora pena pena!! Dal gunbio in zΓ², jero tuto ingessΓ . Me mama la ga finio de parlare col Dotor Crivelaro. La ga saludΓ  la Suora e l Infermiere. ZΓ² dale scale ghe jera la bicileta. La me ga messo sol manubrio e semo ndΓ  casa! Β» (continua) (Linus DownUnder – Lino Timillero, Coniston 17-3-2019)

Foto: Il ‘fosso’ e la ‘renghiera’ di quella che era ‘la casa de Plinio‘ (Umberto Ravagnani).

Umberto Ravagnani

Se hai FACEBOOK e l’articolo ti ha soddisfatto metti MI PIACEΒ 
Oppure lascia un commento qui sotto…

Un commento

Lascia un commento

Il tuo indirizzo email non sarΓ  pubblicato. I campi obbligatori sono contrassegnati *