BORGOLECCO STORY (1)

[238] BORGOLECCO STORY (1)

LINO TIMILLEROCONISTON – Nuovo Galles del Sud (AUSTRALIA)


Lino Timillero dall’Australia ci racconta, in alcune puntate, i ricordi della sua vita a Montebello, quando abitava nella zona di via Borgolecco.
Β« Cari Amici, Par scomiziare la storia dei nialtri tusiti che stavimo nte la via Borgolecco, se gΓ  da dire che jerimo cuasi tuti nati in tempo de Guera o calche ano dopo, 1943, ’44, ’45… Via Borgolecco la gΓ² vista par la prima volta cuando ne gΓ  tocΓ  de fare San Martin. La me famejia la stava so la casa ndove che ghe xe el porton de fero grando, so la destra dei Giardineti. A chel tempo, no ghe jera gnanca na casa de lΓ  de la mura che scomiziava tacΓ  al porton e la nava drita fin ala Stradela che desso la se ciama dele Carpane. De cuΓ  ghe jera i Giardineti e de lΓ  de la mura ghe jera el Parco de la Villa.

Me popΓ  el fasea el guardian e el giardiniere del Parco. Tanto par darve na idea, na volta, pena finio l’inverno, me popΓ  el me contava chel jera drio sparpajiare on poco de luame vizin a ndove che jera sentΓ  zΓ² la Contessa co le Contessine. Co le gΓ  sentio la spuzza, le gΓ  dito: β€œBepi ma sa falo?”, e me popΓ : β€œSon drio metere on poco de luame cussΓ¬ l’erba vien sΓΉ bela. β€œE la Contessa:” Ma el vaga da naltra parte!” E cussi me popΓ  el ga fato! Riva la bela stajion, l’erba scomizia a cresare. Bela,verde, via del posto vizin a ndove che se sentava la Contessa. E la se gΓ  inacorta de la difarenza!!! Co xe pasΓ  par de lΓ¬ Bepi, la lo gΓ  ciamΓ : ”Bepi, stano che vien el meta el luame ndove chel vole che se spostaremo nialtre.” E me popΓ : β€œSΓ¬ Signora Contessa…”. De San Martin del mile novezento e cuaranta siΓ¨ (1946) semo ndΓ  dala casa fin ala Via Borgolecco par le strade che ghe jera drento ala Villa. Sol carro tirΓ  dal cavalo, ghe jera tute le robe de casa: leti, armari, careghe e la tola par magnare… Tuto cargΓ  sΓΉ e ligΓ  che no cascasse gnente. Prima che fusse fata la Via IV Novembre, ndove che la fΓ  incrocio co la Via Borgolecco, ghe jera on porton grando, co la inferiΓ  che se verzeva da tute do le parte par far pasare i carri grandi. Da l’altra parte de la Via Borgolecco, ndove che desso se va sΓΉ par Via Manzoni, ghe jera naltro porton grando, conpagno de chelaltro, e se pasava par nare in corte da Bellini. Pena drento del porton, lΓ¬, sol canton, ghe jera la Vera da Pozzo che xe stΓ  portΓ  sui Giardinetti! E lΓ  xe stΓ  portΓ  anca i du pilastri de un porton. Chel altro porton, inferiΓ  e tuto el resto, el xe stΓ  messo sola parte de la via IV Novembre, par nar drento a ndove che jera el Canpo dela vecia Casa del Fascio, che, finia la Guerra, xe stΓ  conprΓ  tuto dal vecio Zonin.
Nialtri ne tocava far San Martin parchΓ¨ i Paroni dela Villa e de tuta la tera, poco dopo finia la Guerra, i gavea vendΓΉ fora tuto! Da la mura de Via Borgolecco fin in zima ala Via Pegnare e ala Via San Francesco de desso, e dala mura dela vecia Villa Casarotti fin ala mura ndove che ghe xe Via Volta desso. Tuto vendΓΉ!!! El Parco al Moro Fiasca che dopo el ga vendΓΉ al Comune. La Villa vendΓΉ a tochi a tri cuatro paruni. La tera sΓΉ pal monte ai fradei Gamba. De sti fradei, uno nol jera gnanca sposΓ  e chelaltro el gavea cuatro fioi. La casa ndove che ndavimo in afito so la Via Borgolecco, la jera la ultima, passΓ  l’ostaria ndove che jera el zugo de le bocce. La jera tacΓ  co altre tre case co tre famejie difarenti. Dosento metri pΓ¬ vanti ghe jera altre tre case una tacΓ  l’altra. LΓ  ghe stava me zia Veronica. Mi gavarΓ² vudo du ani. El San Martin xe el me primo ricordo. Poco pΓ¬ de on ano dopo che stavimo lΓ , me go inacorto che ghe jera na toseta che la jera senpre casa da so nona. Ghemo scominziΓ  a zugare nsieme. La se ciamava Anna Rosa. Cuela che, diventΓ  Signorina, la se gΓ  sposΓ  co Bruno, so fradelo de Silvano e de Sergio (anca de Sandro, ma el jera massa picolo!).
Ndove che la Via Borgolecco la fa come na S, e so la seconda curva scomizia la Via Verdi, lΓ  nava vanti la mura co na stradela. NtrΓ  la mura e l’orto de la casa de Silvano, ghe sarΓ  stΓ  cuatro metri. De drio ala casa de Silvano ghe jera ncora case. LΓ  ghe stava i fradei Filotto. So la curva de la strada ghe jera el rubineto de l’acua. Tuti se nava tore l’acua al rubineto cole sece e col bigolo! El rubineto el vignea sΓΉ da par tera, tacΓ  a on toco de piera alta fa mi e sagomΓ  rotonda par sora. Al Inverno bisognava ricordarse de assar verto on poco l’acua parchΓ¨ se nΓ² la se gavaria jazzΓ  e no saria pΓ¬ vignΓΉ fora acua finche no la se disgiazava! Naltro rubineto conpagno, el jera so la curva ndove ca scomiziava la Via Monte Grappa. LΓ , co jero pΓ¬ grandeto che podevo portare el bigolo senza far tocare le sece par tera, navo anca mi a tore l’acua. Me mama tacava le secie sora el seciaro e ghe jera la cazza de rame par bevare. Naltro rubineto conpagno el jera poco distante de ndove che desso ghe xe la Vera da Pozzo sui Giardinetti. LΓ , co navo da me fradelo Vittorio chel stava ntela corte dei zeolari, zerte volte navo torghe l’acua par me cognΓ  Flavia parchΓ¨ Giorgio el jera ncora picinin e me nevoda Marianela no la jera ncora nata. So la stradela ndove che stava Silvano, se zugava dele bele partie de calcio. Se metea du sasi par tera ndove che scomiziava la stradela, par fare le porte, e altri du sasi ndove che finiva le case ala parte de cuΓ  de la mura.
I fradei Filotto tirava fora la bala, se fasea le scuadre e se zugava fin che vignea ora de nar magnare ala sera! Luigi el stava on poco pΓ¬ vanti, pena che se ndrizava la strada. LΓΉ e so fradelo Gaetano, no i zugava tanto co la bala, ma i jera boni a zugare la β€˜Porcola’. Par zugare, la β€˜Porcola’ jera stΓ  fata de on toco de manego de spazaora. On tochetin curto (diese zentimetri) co le punte par farlo saltare e baterlo col jera pararia doparando on toco de manego lungo poco manco de on metro. Ndove che ghe jera el rubineto, se metea el saso groso chel fasea de bota. Chi che scomiziava par primo, el gavea da batere la β€˜Porcola’ al volo. Se calche dun la ciapava par aria cuel che la gavea batΓΉ el jera zΓ  fora. Lora bateva chi che gavea ciapΓ  la β€˜Porcola’. Ma el pΓ¬ bravo a zugare a β€˜Porcola’ el jera Andrea, so cugin de Luigi. So la Via Borgolecco, verso el Monte Castello, ghe jera na mura alta, dal Porton de la Corte de Bellini, fin ala mura vizin ala casa de Silvano. E da lΓ¬, zigazagando, fin sΓΉ ndove che desso ghe xe Via Pegnare.
Prima che fusse scomiziΓ  la strada nova, (Via IV Novembre) xe stΓ  scomiziΓ  a fabricare le prime do Case Fanfani. In fra mezzo, desso ghe xe Via Pedrollo. Dopo xe stΓ  fabricΓ  le case par i mpiegati del Comune: do case par i Maestri e do case par chi che laorava pal Comune. Calche ano dopo, xe stΓ  fabricΓ  la terza Casa Fanfani, dala parte de la curva dela strada. LΓ , dopo che el paron de la casa ndove che jerimo in afito ghe gΓ  mandΓ  el sfrato a me mama, semo ndΓ  a stare nialtri. No gavivimo altre speranse. Me popΓ  el jera in Svizara a laorare. Me mama la disea sΓΉ tarzeti tute le sere, e anca nialtri fioi. La pianzea, e la disea: β€œNe tocarΓ  nar dormire soto al Ponte… Madona jutene ti!” Col secondo San Martin, so ndΓ  a stare ncora pΓ¬ vizin a Luigi e Silvano e Andrea. So le altre do Case Fanfani, ghe stava Roberto so una e Guido stava so chelaltra. De tosete, a parte Anna Rosa, co jero pΓ¬ picolo, co l’etΓ  che gavivimo, nessun savea se le jera al mondo. Le vedivimo co le nava a scola, in Cesa e ale Procesion, ma pal resto, lΓ¬ β€˜ntorno no me ricordo che ghin fusse! Caminando drio la Stradela dele Carpane, se vede ncora la mura vecia dela Villa. On pochetin pΓ¬ bassa. E la vΓ  sΓΉ fin che la fΓ  el giro co la riva al Capitelo e dopo la vΓ  vanti fin al muro de la vecia Villa, con calche porton par le case che ghe xe lΓ  desso. Β» (continua) (Linus DownUnder – Lino Timillero, Coniston 15-01-2019)

Foto: Uno scorcio di Via Borgolecco a Montebello alla fine degli anni 40 del Novecento. (Elaborazione grafica di Umberto Ravagnani).

Umberto Ravagnani

Se hai FACEBOOK e l’articolo ti ha soddisfatto metti MI PIACEΒ 
Oppure lascia un commento qui sotto…

2 Commenti

  1. Lino Timillero
    La Via Borgolecco: la “strada bianca”. Nel 1949? Case Fanfani: Le Famiglie: Castaman, Perticone, Manni, Sacchinetto. Le Famiglie: Scalchi, Antonin, Pelosi, Feltre. Le case del Comunale, le Famiglie: Facchin, Maggio. Sono le sorelle maestre e la madre la signora Bellini, Dalla Gassa.
  2. Lino Timillero
    P.S. L`Ostaria della Nonna di Andrea. La Tabaccheria era della Nonna di AnnaRosa Nardi. La Famiglia Manni lascia alla Famiglia Palma, gli zii di Momo, Franco e Sonia Scalchi. I Perticone lasciano alla Famiglia Cumerlato Franco il Dottore.

Lascia un commento

Il tuo indirizzo email non sarΓ  pubblicato. I campi obbligatori sono contrassegnati *