BORGOLECCO STORY (9)

[280] BORGOLECCO STORY (9)

LINO TIMILLEROCONISTON – Nuovo Galles del Sud (AUSTRALIA)


Ed eccoci alla nona puntata di ‘Borgolecco Story’ di Lino Timillero: oggi ci racconterà di quando i ragazzi di Montebello andavano in colonia a Velo d’Astico negli anni 50 del Novecento.

« Cossa vol dire vardare na fotografia de tanti ani fa?!? Desso, che xe tuti sti ani che son via da Montebello, son rivà a conosere, “virtualmente”, cuel Signor che se ciama Adelino Fioraso. Adelino se ciamava anca me fradelo. Pecà chel sia morto dal ‘Tetano’ cuando che mi no gavevo gnanca du ani. Anca na me cugina la se ciama Adelina. La gavarò vista tre volte parché i jera ndà a stare vizin a Vercelli! La ‘foto’ la go vista sol ‘face-book’ del Sior Fioraso. Se vede tusi de diese, dodese e forse anca cuatordese ani. Tuti drio vardare Gaetano chel jera drio ciapare el fazoleto tegnù in man dala Signorina ‘Accompagnatrice’! Chissà chi che ghe jera da chel’altra parte? Ma a nialtri no ne ntaressa! A nialtri ne ntaressa el ‘Posto’ ndove che xe sta fata la ‘foto’! Sol davanti dela ‘Colonia Alpina de Velo d’Astico’!!! Vialtri dirì: sa centra la ‘Colonia’ cola Via Borgolecco? Se el Sior Fioraso el ne nprestasse cuela ‘foto’, tuti podaria vedare chi che xe i tusi che xe drio zugare davanti ala porta del stanzon ndove che se nava a magnare tre volte al giorno co se jera in ‘Colonia’. Fé el conto: Luigi e so fradelo Gaetano; Roberto e Gianni. I stava tuti sola Via Borgolecco. Gianni, a dir la verità, el stava ala parte de là. Casa sua la jera dala parte de la Via VIII Aprile, on toco dela vecia ‘Villa’. Ma ghe jera na portina che se podea nare drento e fora dalla Via Borgolecco. La vignea doparà dale tose che laorava ala fabrica de Botoni de so popà de Gianni. E ghe jera le finestrele col inferià par farghe ciapar aria ale tose che laorava. Come fazzo mi a savere de la ‘Colonia’? Ma parché ghe son stà anca mi! No chel ano lì. Ma l ano prima, coi ‘Aspiranti’. E du ani prima son stà là on mese coi tusiti dele fameje bisognose!

La ‘Colonia’ jera stà scomizià da Don Giuseppe Stella! Dala ‘Colonia’, vardando dala parte dela Pria Forà, se vedeva na casa granda, cola stala. Forse cuatrozento metri distante dala ‘Colonia’. Là ghe stava la fameja de Don Giuseppe. (Cussì disea i tusi pì grandi!) No voria sbaliarme, ma sola ‘foto’, ghe xe anca el Sior Adelino. Lo ciamo ‘Sior’ parché el xe massa bravo a far fotografie!!! Cole so foto go visto tante robe e tanti posti! Gavì da ricordarve che mi son senpre in Australia! Se vedo calcossa de novo che capita a Montebello, xe da ver on poca de creanza e portar rispeto. Xe vero sì o no??!! Cuando che mi so ndà in ‘Colonia’ par on mese, ghe jera Don Francesco. El stava là du tri dì ala setimana. El gavea la ‘Topolino’. Cuando che jerimo rivà a Velo d’Astico cola Coriera, le Suore le ne ga messi in fila par tri e semo partii a pié par nar su ala ‘Colonia’. La Coriera no la podea fare le curve dela strada che la jera massa streta. Semo rivà su prima de mezodì. Le Suore le ne ga messo in fila de novo par farne bevare la ‘Magnesia San Pellegrino’ prima de magnare. E dopo magnà semo nà suito so on posto che se ciamava ‘La Pineta’. On poco distantin!! Co se vardava in su, se vedea Monti de Sasi. I ghe ciamava ‘El Coleto’. Dala parte de drio dela ‘Colonia’, pì distante, se vedea tuti Monti! I ghe ciamava Cengio e Cimone e se vedea la strada del Costo par nar su a Asiago. De sera jera belo vedare le machine cole luci ‘npizzà che le nava su e zò par la strada!!! Suor Albina la ne fasea rigar driti tuti cuanti. Mi la conosevo da cuando che navo al’Asilo! E anca ela la me conoseva!!! “Sito senpre drio farghene una?” la me diseva!!! Anca se no fasevo gnente. Mi, cuel che go scrito fin cuà, le xe tute robe che me ricordo! Cuando che gavarò finio de contarve de la ‘Colonia’, podarì lezzere la ‘Intervista’ che ghe xe stà fata, a Suor Albina, sol libro: “Montebello Novecento”. Là, Suor Albina la conta come ela se ricordava la ‘Colonia’. La se ciamava” Santa Maria Assunta”, la ‘Colonia’. Ma, se no me sbalio, me pare che ghe sia anca el Sior Adelino sola ‘foto’! El xe on poco mimetizzà, col fazoleto che ghe cuerze la testa! O sela na bareta? Selo cuelo vizin a Luigi?? Me par de sì chel sia cuelo!?! Mi no so se desso i tusi che xe stà in ‘Colonia’ se ricorda, ma mi me ricordo de sicuro. De cossa? Co se nava in giro pai buschi de pini, o a zugare col balon ndove che ghe jera la ‘caseta’ tuta rota, nessun ne portava drio on “cesso” portabile. Va ben: on mese nava in ‘Colonia’ solo che tusiti. E on mese solo che tosete! Ma co ne ocoreva de fare i ‘bisogni’, se nava de drio a on frascaro e se fasea cuel che se gavea da fare. O anca de drio ai sasi grandi che ghe jera in giro. I disea che i jera cascà zò dal Monte!!! Co i cascava i se tirava drio tute le piante che ghe jera davanti Na volta che Don Fracesco nol ghe jera, la Suora Albina la me gaveva dito, prima de nare in leto, che la matina drio la me gavaria ciamà su presto par nare zò a Velo a tore el pan. “Mi te ciamarò e te ndaré co Menego fin dal fornaro.” La me ga dito cussì, e mi suito: “Ma Menego lo salo ndove nare?” “Ma te saré senpre cuelo vhé.” La suora Albina la finia senpre el so discorso con chela parola lì:” Vhé.” Ma mi no go mai vudo paura de ela!!! Gnanca cuando che jero al’Asilo e la me ligava le man de drio parché la disea che no stavo mai fermo!!! Co la ne insegnava come metare la particola in boca par la prima ‘Comunione’, mi gaveo senpre fame! La magnavo suito… “Noooo… la me zigava drio!!! Te ghe da “Dissolverla” tra la lingua ed il palato.” Ma cossa volea dire Dissolverla????

Co Menego, du ani depì de mi, semo ndà zò pai strozi. La strada che nava su ala ‘Colonia’ la jera tute curve. Nialtri navimo zo che cuasi no caminavimo gnanca sola strada. Menego el gavea na zesta par metare el pan. Jera presto parché se gavea da portare indrio el pan par magnare ala matina. Ma se podeva vederghe ben par nar zo pai strozi. El fornaro ne ga npienà la zesta de pan. Menego el gavea anca na tovajieta par cuerzere el pan. El ga ligà i cuatro cantuni dela tovajieta sola zesta e semo partii par rivar su ala ‘Colonia’ prima che tuti i tusiti fusse sentà sole tole a magnare el cafelate. Nar su, semo na par la strada. Menego el tegnea el manego dela zesta da na parte e mi da chel altra. No corivimo, ma spesegavimo ben. E cuando che se podeva, navimo istesso su pai strozi. Dormivimo tuti sole brande che ghe jera drento al Cameron. Se nava su par la scala: in fila par due. Pì de na volta, calchedun zigava parche i ghe gavea fato el ‘saco’. El ‘Saco’ vol dire che calchedun el piegava el nezolo soto ala cuerta. Dopo el meteva ben a posto la cuerta e chi che nava in leto nol podea slungare le ganbe cussì el restava inpapinà! E tuti ghe ridea drio!! Depì de vinti ani dopo, me ga tocà dormire ncora sola branda. Co laoravo in giro pai ‘Canpi’ fati de ‘Barache’. E anca cuele le jera brande assà ndrio dai Mericani co xe stà finia la IIa Guerra Mondiale, cuà, in Australia. (Grazie Adelino!) ». End of Part IX Linus Down Under Coniston 28-3-2019.

Foto: 1957 colonia estiva di Velo d’Astico (Archivio parrocchiale di Montebello Vicentino – Rielaborazione grafica Umberto Ravagnani).

Umberto Ravagnani

Se hai FACEBOOK e l’articolo ti ha soddisfatto metti MI PIACE 
Oppure lascia un commento qui sotto…

Un commento

  1. Angelo scala
    Beh, leggere un articolo in dialetto scritto da una persona lontana dal paese anni e anni fa, con la descrizione nei minimi particolari è fantastico … faccio i complimenti al sig. Timillero.

Lascia un commento

Il tuo indirizzo email non sarà pubblicato. I campi obbligatori sono contrassegnati *