BORGOLECCO STORY (3)

[248] BORGOLECCO STORY (3)

LINO TIMILLEROCONISTON – Nuovo Galles del Sud (AUSTRALIA)


Lino Timillero dall’Australia ci racconta, in alcune puntate, i ricordi della sua vita a Montebello, quando abitava nella zona di via Borgolecco.
Β« Chi che lezze sta storia gΓ  da tegnerse inamente che, mi che scrivo, xe zincuanta dΓΉ ani che son in Australia! Tante robe che conto le sΓ² parchΓ© me le ricordo. E la Via Pegnare, e del parchΓ© che la se ciama cussΓ¬, lo so anca mi. Cuando che, dala Via Borgolecco se vardava in sΓΉ verso el Castelo, se vedea na Pegnara. Par cuei puchi che no sΓ  cossΓ  che xe na Pegnara, se podaria ciamarla in Italiano: Pino Mediterraneo. Le vegnea piantΓ  parchΓ© le fasea le Pegne, e, dale Pegne vignea fora i Pignoi. Stiani, i Pignoi vegnea vendΓΉ in giro dapartuto. Chi che gavea schei, come i siori, i li conprava par magnarli in tante maniere. β€˜Pasta col Pesto’ la xe conosesta anca desso! Prima dela IIa Guerra, drio ala Via Pegnare, ghe jera tante Pegnare. Le ghe xe ncora desso, tre cuatro, drento ala Villa Miari. Le Pegne de la Pegnara, co le cascava par tera, le vegnea cata sΓΉ nte le zeste, anca da Bepi co so fiolo Vittorio. Dopo le vignea portΓ  zΓ² e inmuciΓ  so le scansie drio al muro de la baraca ndove che vignea messe le piante de Limonari co rivava l Inverno. Cuando che piovea o co no ghe jera tanto da fare, se sverzea fora le Pegne par tirar fora i Pignoi, par meterli drento a scatole de legno fate aposta. El fatore Bellini el savea ndove mandarli par venderli.
Dopo tri ani de Guerra, cuando che la xe rivΓ  anca a Montebello, xe rivΓ  anca tanti todeschi. DepΓ¬ de prima. E xe stΓ  taiΓ  zΓ² le Pegnare par fare tuti cuei lauri che i todeschi jera drio fabricare dapartuto, par le β€˜Difese’ contro Mericani e Inglesi! Desso, ndove che Via Manzoni la scomizia, al incrocio co Via Borgolecco, pΓ¬ vanti, la gira de cuΓ  e de lΓ  e la vΓ  sΓΉ a ncontrarse co la Via San Francesco. LΓ  scomizia la Via Pegnare! E lΓ  vizin jera ndove che se vedea l ultima Pegnara che jera restΓ  in piΓ©! Par finire la strada e fabricare tute che le Palazine che ghe xe in giro so chel posto lΓ¬, xe stΓ  tajiΓ  l ultima Pegnara!
Cuando che Silvano e mi jerimo sΓΉ so la Via Pegnare, e nialtri gavivimo oto, diese ani, no savivimo mia che la strada drio la mura de Ganba se ciamava cussΓ¬. Jerimo sΓΉ lΓ  parchΓ© ne piaseva rivare fin sol colmo del Monte e vardare da che laltra parte! Se vedea Zarmeghedo, Montorso e sΓΉ fin a Arzegnan e tuti cuei monti de drio. LΓ¬, vizin al Castello, jera stΓ  scavΓ  e ghe jera i Caminamenti. Fati al tempo de la Ia Guerra Mondiale. PareciΓ  se par disgrazia i Austriachi gavesse roto el Fronte sol Pasubio e sul Piave!!! Cuando che volivimo ndare sora al Monte, no ndavimo mia par la strada. Saltavimo la mura lΓ¬, vizin casa sua, e ndavimo su, pian pianelo, vardando ogni tanto dala parte de la casa dei Gamba. Cuando che volivimo saltare la mura, gavivimo da star tenti parchΓ©, in zerte parte, par sora ghe jera tochi de vero tacΓ  cola malta. Ndove ca jerimo, desso ghe xe Via Galilei, Via Zin e Via Volta, fin soto al Bosco. LΓ , so cuel Bosco, ghemo visto, dal vero, on porzeleto rizzo!!! E ghe semo stΓ  drio on ora, forse de pΓ¬, par zercar de ciaparlo!!! Giravimo, pian pianelo, par no sgrafarse le man e la facia parchΓ© jera pieno de russari. Na volta, lΓ , sol Bosco de Gamba, cuasi, cuasi, gavarissimo ciapΓ  on Ghiro. Co lo ghemo visto, el jera soto a on russaro. Silvano el gavea in man on baston (el se lo portava senpre drio), e con cuelo el ghe fasea paura al Ghiro, sbatendo el baston de cuΓ  e de lΓ !!! Nialtri, co lo ghemo visto, se ghemo meravejiΓ ! Savivimo che el Ghiro vΓ  in giro de note. Ma no volivimo chel ne scapasse come el porzeleto rizzo!!! El Ghiro se jera ranpegΓ  su par na pianta de cassia. Se vedea la bela coa chel gavea. Piena de pelo griso co on poco de maron. Silvano el gΓ  fato on salto. El ghe gΓ  ciapΓ  la coa co tute dΓ² le man: β€œLo go ciapΓ ! Lo gΓ² ciapΓ !!!” el zigava. Inveze ghe xe restΓ  le man piene del pelo de la coa del Ghiro. Ma el Ghiro no lo ghemo pΓ¬ visto!!! Lora, el Bosco rivava fin ala mura dela Vale e de drio la jera tuta tera dura fa sasso!!! Prima che fusse scomiziΓ  la terza casa Fanfani, cuela ndove che semo ndΓ  stare mi e la me famejia, la Via Borgolecco la jera ncora da sfaltare!
Mi me ricordo ben! Cuando che i perseghi se maurava, chi che podea conprarli, i li magnava anca par strada. E dopo i butava via l osso. Sì, l osso del persego! La Festa del Rosario la vien, lora come desso, al sete de Otobre. Me mama la fasea senpre el Scrocante. Come???!
Schei par conprare le mandole no ghin jera! Cussì me mama ne disea, a mi e a me fradelo Albano, de catar sù i ossi dei perseghi e anca cuei dei armelini. Ghe jera dù mesi de tempo! La Via Borgolecco, no sendo sfaltà, jera la pì fazile par vedere on osso de persego o de armelin caminando e vardando par tera!
Co ghe jera bastanza ossi, gavivimo on marteleto, e se metivimo a spacare i ossi de persego e de armelin. Me fradelo scomiziava par primo parchΓ© jera fazile farse male i dei! Pal giorno prima de la Festa del Rosario, me mama la catava senpre on poco de zucaro, e no sΓ² come che la fasesse, ma chel scrocante che la fasea el jera cussΓ¬ bon che mi no ghinΓ² mai magnΓ  de conpagno!!! Se sentia el maretto dele semenze de persego e de armelin. Ma che la parte de zucaro caramelizΓ  che la smisiava co le semenze dei ossi, el ghe dava on gusto cussΓ¬ bon al scrocante, che anca me fradelo Luigi, chel xe cuΓ  in Australia co mi, el se ricorda ncora anca lΓΉ. E lΓΉ, sendo nove ani pΓ¬ vecio de mi, el nava anca lΓΉ, col jera picinin, a catar sΓΉ i ossi, ma lΓΉ el nava sΓΉ par Via Vaccari, parchΓ© alora stavimo zΓ² ai Giardinetti. La Via Vaccari la jera sfaltΓ  fin ala Canonica. PΓ¬ vanti, strada Bianca col giarin da le parte, come la Via Borgolecco. El stradin el contava che no jera mia fazile catare el ludron par sfaltare le strade! Me fradelo Luigi, calche ano fΓ , col jera pΓ¬ zovane cuΓ  a Balgownie, ndove chel stava, el gavea provΓ  a farse parfin le β€˜Conposte’.
No savΓ¬ mia cossa che le xe le β€˜Conposte’???! Mi co jero toseto, navo su par Via Monte Grappa, che la scomiziava ndove che ghe jera l Ostaria col zugo de le Bocce, par nare in corte de me santolo Scarpareto. Me mandava me mama par tore dΓ² β€˜Conposte’. Me santolo el me fasea nare co lΓΉ soto ala tezza ndove che ghe jera la tina che gavea drento le β€˜Conposte’, in mojia cola Graspia. Le jera dΓΉ tochi de na verza tajiΓ  a metΓ  e ligΓ  co na stropa de salgaro. La Graspia, la xe fata co la ua, dopo che la jera stΓ  strucΓ  col Torcio. Stiani ghe jera depΓ¬ contadini che se fasea el vin par tegnerselo so la so Caneva. Lora cuasi tuti gavea el Torcio.
Dopo che l ua jera stΓ  schizzΓ , la vignea messa drento ala tina nsieme co l acua. CussΓ¬ vignea fora la Graspia. I omini che nava a tajiare l erba sui prΓ  col fero da segare, i se portava drio dΓ² tre zuche piene de Graspia. La jera mejio de acua s-ceta!!! E la vignea doparΓ  anca par fare le Conposte. Se tajiava le verze a metΓ . Se fasea on buso col ciodo e se pasava drento na stropa de salgaro. Se fasea on gropo e le se metea a bagno ntela Graspia. Le saria stΓ  pronte dopo on paro de setimane. E che bone che le jera, cote col museto e calche coezza de mas-cio!!! Β» (continua) (Linus DownUnder – Lino Timillero, Coniston 26-01-2019)

Foto: Vecchi amici posano in via Borgolecco nel corso di una calda estate dei primi anni ’70 del Novecento (Cortesia Lino Timillero, rielaborazione grafica di Umberto Ravagnani).

Umberto Ravagnani

Se hai FACEBOOK e l’articolo ti ha soddisfatto metti MI PIACEΒ 
Oppure lascia un commento qui sotto…

BENEDETTO NIPOTINO

Β 

⁕  AREA RISERVATAΒ  ⁕

Per visualizzare questo articolo Γ¨ necessario registrarsi o accedere con le proprie credenziali. La registrazione Γ¨ semplice e gratuita: dal menu in alto a destra scegliere AREA RISERVATA β†’ REGISTRAZIONE, inserire iΒ  propri dati e premere su REGISTRAZIONE. In breve tempo verrΓ  approvata la vostra richiesta e, quindi, potrete entrare nell'area riservata con ACCEDI usando l'indirizzo e-mail e la password scelti nella fase precedente.

Gli articoli dal 2001 al 2020 compreso sono stati raccolti in un volume, riccamente illustrato, disponibile su prenotazione presso la nostra redazione (AUREOS 2001-2020) e sono ancora consultabili online previa registrazione al sito.