borgolecco Archivi ⋆ AMICI DI MONTEBELLO

BORGOLECCO STORY (5)

4 Novembre 2021, 17:01 4 Novembre 2021 0

[258] BORGOLECCO STORY (5)

LINO TIMILLERO – CONISTON – Nuovo Galles del Sud (AUSTRALIA)

Nuovo episodio di Lino Timillero, dall’Australia, sulla sua vita a Montebello, quando abitava nella zona di via Borgolecco.
« Cuando che la Catina ne gà tajià la luce, co vignea el fredo, nialtri navimo a filò da Plinio. La so corte la jera anca cuela so la via Borgolecco. Ala parte de là dela strada ghe jera el porton grande. Fato de fero e cola rete de fero. Cuando che ghe jera le malatie dele vache, come l afta pizotica, i pilastri del porton i jera senpre incalzinà che se vedesse ben el bianco. Cussì, se rivava calche careton tirà dale vache o dai bò, se savea che se dovea nar ciamare Plinio, prima de nare drento. L afta pizotica jera na bruta malatia che fasea morire le vache e Plinio el stava tanto tento che le so vache no la ciapasse.
La tera de Plinio la rivava dala via Borgolecco fin dove che ghe xe la via *Giovanni Gentile desso, vizin ale scole e al canpo de Calcio novo. Da chel altra parte, la tera de Plinio nava zò par la strada fonda cuasi fin dove che stava Bijio Colonbo, cuelo che slevava ncora i cavalieri in cusina cuando che jera la stajion dei cavalieri. In corte da Plinio vignea anca la trebiatrice. Dopo che jera stà portà tute le fajie de formento sola corte, inmucià davanti ala stala, rivava la Trebiatrice. La jera na Machina Granda. Tirà in corte col tratore. Par nare drento pal porton, bisognava che se fasesse le manovre, da cuanto Granda che la jera! Mi li vedevo. Da casa mia ghe sarà stà 15 metri. Par farla laorare, ghe ocorea on tratore groso, co na rua che vignea fora dal motore. Ala rua i ghe ciamava Volano. Vignea pasà na zengia torno che la rivava fin a naltro Volano so la Trebiatrice. Vignea scaldà la testa del motore del tratore par far partire el motore. Lora el Volano el fasea corere la zengia fin che anca chel altro Volano girava. La Trebiatrice la scomiziava a laorare e i omini i metea le fajie de formento drento el buso par sora. E i trebiava par do-tre jornate. De drio de la trebiatrice vignea insacà el formento e davanti vignea fora le bale de pajia che se doparava in stala par le vache. Tuto el tempo del ano. Na Trebiatrice cussì, la ghe jera anca a casa de so popà de Gianni Verlato, vizin ala Canonica. Cuela la jera al cuerto, senpre ferma là. Ma là ndava cuei che no gavea tanto formento da trebiare. Parò, co jera el so tempo, anca dai Verlato ghe jera on mucio da fare!!! In stala da Plinio, co fasea fredo la sera, se stava ben caldeti. El gavea na dozena de vache e anca tri cuatro vedei. Pì de calche dona se portava drio na caregheta par star sentà zò fin che le ciacolava. Ma, par prima roba, se scomiziava a dir sù el “Tarzeto” co tuti i ‘Misteri’. Calche dona fasea su isteso on maljion, o calche calzeto coi feri, ma cuasi tute le rispondea ale Ave Marie e le stava tente ai misteri venerari. Ghe jera on canfineto chel fasea luce par vederghe on poco. Par sentarse ghe jera anca le bale de pajia. Le done le ciacolava. Omini ghin jera calche dun. De tusiti, jerimo in zincue-sièe se movimo senpre. Na sera ala setimana, Plinio el metea fora na zesta de panoce da scaolare. Bisognava che tuti scaolasse le panoce par lu. El jera el paron dela stala. Lu el disea che al canfin se gavea da meterghe el petrolio e che le ciacole no gavea mai fato ciaro de note! Scaolavo anca mi. Ma, de scondon, me metevo na man advanti ala boca e con chel altra man me metevo in boca on par de grani de sorgo ala volta e i rosegavo pian pianelo. Ma gavevo da star tento che no me vedesse nissun. Se el paron se fusse inacorto, el gavaria scomizià a dire che la jente la vignea a filò par magnarghe el sorgo. Se tuti gavesse fato cussì el saria restà sensa sorgo e conpagnia bela. E tuti savea che Plinio el jera on omo de Cesa. Par cuelo le done le disea su el tarzeto coi Misteri Venerari, parchè el se ricordasse chel jera on omo de Cesa. A calche dun che ghe dimandava, Plinio ghe assava meter on poche de piantine de verze so la so tera. A metà par un. Se un metea zò zento verze, le jera zincuanta par Plinio e zincuanta par chi che le inpiantava. Ndove che desso ghe xe la via Giovanni Gentile*, là ghe jera on fosso senpre pien de aqua. Calche dun gavea ficcà zò on tubo sol fosso e vignea senpre fora aqua. E ghe jera fossi co l aqua dapartuto! Desso no ghe xe pì gnanca cuei!! Desso lì ghe xe le scole Medie!
Co jero diventà bastanza grando da nare co la bicicleta da dona de me mama, la me mandava a Zarmeghedo a tore on zentenaro de piantine de verza. Me tocava nar sù par la pontara dela Cesa. Sù ncora, passà el Cimitero de Zarmeghedo. E ncora pì sù fin ala corte dei Bertola! E senpre parando sù la bicicleta a piè parchè la jera tuta na pontara! Anca le strade da chele parte là no le jera inludronà, come la via Borgolecco. Me mama jera na Bertola, e anca me popà jera nato a Zarmeghedo. Na parente de me mama che mi no conosevo la me ga dà le piantine de verza. Messe par ben. Inscartozzà co la carta bela mojia e messe drento ala sporta tacà sol manubrio dela bicicleta. La parente de me mama la me ga dito: “To mama me ga dito de dirte de nar zò pian pianelo! E de star tento de no cascare e farte male. Gheto capio?!!!” E mi: “Sì sì grasie.” Nar zò la jera na belessa!!! Zò in disesa!!! Me parea de ndare a zento al ora!!! Rivavo casa come on lanpo!!! So stà tento co son rivà sola curva de la Cesa. E zò dal ultima pontara. Senpre tento de no frenare col fren de la rua davanti!!! E navo par traverso. On poco pì longa, ma pì bei posti: Belocaria, Parosa, ndove che stava me zia Nina e me cugina Itala. Pasavo vizin a ndove che stava Bepino e ale case dei Fioconi e dei Zordan. Dale parte dela strada ghe jera tuto giarin e gaveo da star tento parchè la rua davanti dela bicicleta la podea sfondarse e lora cascavo par tera! Co rivavo in Vigazolo, ghe jera el ludron so la strada. Navo zò de corsa parchè lora machine ghi jera poche. Rivavo in Piassa e navo suito so la via Borgolecco. Zincue minuti e jero casa! On poco prima che ndasse zò el Sole, me catavo co me mama sol canpo de Plinio a meter zò tute le verze. Jero drio zugare col balon al Oratorio. Me fermavo. Pasavo de là dela rete. El toco de tera ndove che se podea metar le verze el jera poco distante. Me mama fasea el buseto so la tera. La metea zò la verzeta e la sarava la tera torno. Mi jero lì pronto col secio co l aqua del fosso e col pegnatin a bevarare la piantina par la prima volta. Cussì nparavo ndove che le jera le nostre de verze. Dopo, no me gavaria sbalià a bevararle, cuelo xe poco ma sicuro! Sì parchè almanco par tre cuatro setimane, a seconda de che tempo chel fasea, me tocava nar bevarare le verze ogni dì, fora de la Domenega. E volea dire fermarse de zugare el balon. “Ndo` veto Lino?” me dimandava Ernesto e Roberto. Mi disevo: “Torno indrio suito”. Silvano nol me disea mai gnente parchè el savea zà ndove che ndavo. Cuando che le verze jera pronte, navimo sol canpo co la cariola. Plinio el jera zà là. Metà verze par lù e metà se le portavimo casa par metarle naltra volta in te la tera ndove che le podea stare fin a tuto l Inverno. Calche volta tiravo via la neve par catarghene una da darghe a me mama da far da magnare.
*Giovanni Gentile*: I Montebellani sono al corrente di “chi era costui ???!” » (continua) (Linus DownUnder – Lino Timillero, Coniston 22-2-2019)

Foto: La trebbiatrice, protagonista della vita contadina per tanti anni (adattamento grafico Umberto Ravagnani).

Umberto Ravagnani

Se hai FACEBOOK e l’articolo ti ha soddisfatto metti MI PIACE
Oppure lascia un commento qui sotto…

BORGOLECCO STORY (4)

30 Settembre 2021, 17:01 3 Ottobre 2021 0

[253] BORGOLECCO STORY (4)

LINO TIMILLERO – CONISTON – Nuovo Galles del Sud (AUSTRALIA)

Continua il racconto di Lino Timillero, dall’Australia, della sua vita a Montebello, quando abitava nella zona di via Borgolecco.
« Come che go zà dito, mi xe zincuanta dù (52) ani che sto in Australia. Se vojio savere calcossa de come che xe Montebelo desso, go da vardare el “google-map” sol computer! Senza secarghe le scatole a nissun! Se scrive: Montebello Vicentino, (metendo solo che Montebello, ghin vien su uno chel xe in California!), e vien fora la mapa de Montebello! E se pol nare pì grande: basta tocare i tasti: se pol parfin nare in giro par le strade come sa fusse lì che camino!!! E me son inacorto che, desso come desso, Via Borgolecco la riva fin zò ala Mira!! Na volta, co stavimo poco pì vanti dela pontareta che scomiziava ndove che ghe jera l Ostaria col zugo dele Boce, da de lì in zò, la jera ‘La Strada Fonda’. De Istà, co navimo da me zia Veronica ala sera, ghe corevo drio ale slusole par veder se jero bon a ciaparghene calche duna!!! Le svolava dapartuto!! Le slusole (lucciole)!!! Par nare dala strada ala casa, ghe jera come on marciapiè de sasi un tacà l altro, de colori nero e griso, mesi zò come cuei che ghe jera in Piassa, sol davanti del Municipio. E anca davanti ala Cesa! Se calche dun ghe pensasse: ndove jerili ndà catarli tuti cuei sasi grandi conpagni? I sasi vegnea catà su drento al Cianpo! Tuti conpagni e de colore conpagnà come che li volea chi che li conprava! A me ricordo che na volta don Francesco el gavea portà tuto el Coro de la Cesa in gita. Cantori grandi e picoli, co le mame e le spose, fin a ndove che jera nato San Luigi Gonzaga. Par tera, sol davanti del palazzoto ndove che stava la famejia Gonzaga, dapartuto ghe jera i sasi par tera!! Come cuei de la Piassa de Montebelo!! E coi bei disegni: parfin cole stele co zincue punte! Che belo che jera caminarghe sora!!
La casa ndove che semo ndà stare co ne ga tocà fare San Martin, la gavea na rete de fero che ghe fasea da confine. De là ghe jera i canpi dei du fradei Mericani. I vignea ciamà cussi parchè se savea che i jera stà in Merica a laorare. A uno dei fradrei i lo gavea soranominà Gimy. Desso tute case! E strade! E che bei nomi che le gà. Le strade: Via Benedetto Marcello e Vicolo Vivaldi!! Da chele parti lì ghe jera le slusole. Tante. De sera ghe corivimo drio!!! Me piasaria dimandarghe a Pierino Menti sel se ricorda anca lu dele slusole. Pierino el stava vizin a me zia Veronica, zò par la Strada Fonda. E navimo scola insieme. Fin dala prima clase. Co la Maestra Carlotto. So la casa de Via Borgolecco me mama ghe tocava pagare l afito. Me popà ghe ga tocà nar laorare in Svizara.
Cuando che me popà el laorava par la famejia dei Freschi-Sparavieri, stavimo nte la casa del guardian. Là no se pagava nisun afito! Vizin ala Cesa! Vizin ai Giardineti! Dopo on puchi de misi che stavimo in afito, la Catina la ga vossudo de pì schei par la luce. La corente la vignea dala so casa, delà dal muro. Ela la gavea el “Contatore” e la disea che doparavimo massa luce! Schei me mama no la ghin avea. Pudì maginarve… Me popà, se pol dire, nol jera ncora rivà in Svizara, come podevela me mama avere i schei par poder pagare depì par la luce? L afito dela casa se dovea pagarghelo a on vecio che tuti disea chel jera pien de schei. Ma la luce bisognava pagarghela ala Catina. Ela la gavea el “Contatore”. La Catina ne ga tajà i fili dela corente! Chela sera jera tuto scuro! Me mama la ga tirà fora na candela e ghemo magnà con chel poco de luce che fasea la candela. Me mama la ga catà on “Canfin”. No so ndove! El jera bastanza grandeto. Se podea vederghe ben par magnare. El jera tacà so na trave sora la tola. De sora ghe jera el stanzon ndove ca dormivimo nialtri cuatro fradei. La scala par nar su la jera drio al muro. Me mama la gavea vudo siè mas-ci. Jerimo restà in cuatro parchè Vittorio, el pì vecio, el se gavea sposà e el gavea zà on fiolo. El cuarto fiolo de me mama el jera morto dal “Tetano” col gavea nove ani. A me ricordo ncora desso: cuando che me mama finia de dire el tarzeto, cuasi tute le sere, la disea senpre: ”… e ti, caro Adelino, prega par nialtri e par to popà chel xe in Svizara a laorare par tuti”. Par me mama, de sicuro, me fradelo Adelino el jera in Paradiso, e, almanco lu, el gavaria podesto jiutarne.
Semo na vanti col “Canfin” par dei ani. Me ricordo che, zerte volte, so ndà anca mi a tore na botijieta de petrolio da Panpurio. E dirghe che saria passa me mama par pagare! De fianco dela casa, ntra el muro e la rete del confine, ghe jera el punaro e on poche de galine. Pì vanti ghe jera el cesso. De drio ala casa ghe jera el staloto pal mas-cio. A me mama ghe tocava far da magnare sol fogolare. El jera fato de tochi de piera nera. Bastanza grandeto e pien de zenere dapartuto. La cadena par tacar su el caldiero par fare la polenta la jera tuta nera e piena de caluzine. E là se tacava anca la pegnata par far bujire l aqua da cusinare i spaghetti che jera stà fati col torcio. E me vien inamente ncora el gusto e l odore del salado brustolà sora le bronze del fogolare… E come che la jera bona la polenta, brustolà so la gradela sora le bronze del fogolare! La stua conomica, gnanca insognarsela! Xe passà tri ani prima che me popà, dala Svizara, el gavesse mandà bastanza schei par portarla casa e dopo pagarla a rate! Ma me mama la savea ben come starghe drio al fogolare. Par fare la lissia la scaldava l aqua nte on pegnaton e la lavava tute le robe de la casa drento al mastelo e co l asse da lavare. La ciapava l aqua, che vignea zò par la gorna del cuerto dela casa e la nava drento a na mastela.
Co jero pì grandeto, navo anca mi a tore l aqua col bigolo e du seci. El rubineto del aqua el jera poco pì vanti dela pontareta, tacà a on toco de piera. E me mama la metea i seci sora el seciaro. Sol fogolare me mama la fasea tuto cuel che ghe ocoreva par far da magnare. La gavea na farsora (padella) e con cuela la fasea le torte e la fasea le patate arosto, e tute le robe che ghe ocoreva, E jera tuto bon!!! Co rivava l Inverno e ghe jera on fredo da can, sol fogolare ghe jera tante bronze da metare nte le fogare e rento al leto so le moneghe, par scaldarse co se nava a dormire! Par tuto el tempo che me popà se stà in Svizara, mi dormivo co me mama. Sol davanti dela casa ghe jera na stanzeta e se podea nar drento dala cusina. La gavea na finestrela che se vedeva l orto e la strada. Me popà el vignea casa na volta al ano, co rivava Nadale. Du tochetini de cicolata par mi e me fradelo Albano. Prima che rivasse l Epifania el jera zà ndà via.» (continua) (Linus DownUnder – Lino Timillero, Coniston 18-2-2019)

Foto: Montebello, Ponte Novo: «… I sasi vegnea catà su drento al Cianpo! Tuti conpagni e de colore conpagnà come che li volea chi che li conprava! » (Umberto Ravagnani – 2009).

Umberto Ravagnani

Se hai FACEBOOK e l’articolo ti ha soddisfatto metti MI PIACE
Oppure lascia un commento qui sotto…

BORGOLECCO STORY (3)

26 Agosto 2021, 17:01 26 Agosto 2021 1

[248] BORGOLECCO STORY (3)

LINO TIMILLERO – CONISTON – Nuovo Galles del Sud (AUSTRALIA)

Lino Timillero dall’Australia ci racconta, in alcune puntate, i ricordi della sua vita a Montebello, quando abitava nella zona di via Borgolecco.
« Chi che lezze sta storia gà da tegnerse inamente che, mi che scrivo, xe zincuanta dù ani che son in Australia! Tante robe che conto le sò parché me le ricordo. E la Via Pegnare, e del parché che la se ciama cussì, lo so anca mi. Cuando che, dala Via Borgolecco se vardava in sù verso el Castelo, se vedea na Pegnara. Par cuei puchi che no sà cossà che xe na Pegnara, se podaria ciamarla in Italiano: Pino Mediterraneo. Le vegnea piantà parché le fasea le Pegne, e, dale Pegne vignea fora i Pignoi. Stiani, i Pignoi vegnea vendù in giro dapartuto. Chi che gavea schei, come i siori, i li conprava par magnarli in tante maniere. ‘Pasta col Pesto’ la xe conosesta anca desso! Prima dela II^a Guerra, drio ala Via Pegnare, ghe jera tante Pegnare. Le ghe xe ncora desso, tre cuatro, drento ala Villa Miari. Le Pegne de la Pegnara, co le cascava par tera, le vegnea cata sù nte le zeste, anca da Bepi co so fiolo Vittorio. Dopo le vignea portà zò e inmucià so le scansie drio al muro de la baraca ndove che vignea messe le piante de Limonari co rivava l Inverno. Cuando che piovea o co no ghe jera tanto da fare, se sverzea fora le Pegne par tirar fora i Pignoi, par meterli drento a scatole de legno fate aposta. El fatore Bellini el savea ndove mandarli par venderli.
Dopo tri ani de Guerra, cuando che la xe rivà anca a Montebello, xe rivà anca tanti todeschi. Depì de prima. E xe stà taià zò le Pegnare par fare tuti cuei lauri che i todeschi jera drio fabricare dapartuto, par le ‘Difese’ contro Mericani e Inglesi! Desso, ndove che Via Manzoni la scomizia, al incrocio co Via Borgolecco, pì vanti, la gira de cuà e de là e la và sù a ncontrarse co la Via San Francesco. Là scomizia la Via Pegnare! E là vizin jera ndove che se vedea l ultima Pegnara che jera restà in pié! Par finire la strada e fabricare tute che le Palazine che ghe xe in giro so chel posto lì, xe stà tajià l ultima Pegnara!
Cuando che Silvano e mi jerimo sù so la Via Pegnare, e nialtri gavivimo oto, diese ani, no savivimo mia che la strada drio la mura de Ganba se ciamava cussì. Jerimo sù là parché ne piaseva rivare fin sol colmo del Monte e vardare da che laltra parte! Se vedea Zarmeghedo, Montorso e sù fin a Arzegnan e tuti cuei monti de drio. Lì, vizin al Castello, jera stà scavà e ghe jera i Caminamenti. Fati al tempo de la I^a Guerra Mondiale. Parecià se par disgrazia i Austriachi gavesse roto el Fronte sol Pasubio e sul Piave!!! Cuando che volivimo ndare sora al Monte, no ndavimo mia par la strada. Saltavimo la mura lì, vizin casa sua, e ndavimo su, pian pianelo, vardando ogni tanto dala parte de la casa dei Gamba. Cuando che volivimo saltare la mura, gavivimo da star tenti parché, in zerte parte, par sora ghe jera tochi de vero tacà cola malta. Ndove ca jerimo, desso ghe xe Via Galilei, Via Zin e Via Volta, fin soto al Bosco. Là, so cuel Bosco, ghemo visto, dal vero, on porzeleto rizzo!!! E ghe semo stà drio on ora, forse de pì, par zercar de ciaparlo!!! Giravimo, pian pianelo, par no sgrafarse le man e la facia parché jera pieno de russari. Na volta, là, sol Bosco de Gamba, cuasi, cuasi, gavarissimo ciapà on Ghiro. Co lo ghemo visto, el jera soto a on russaro. Silvano el gavea in man on baston (el se lo portava senpre drio), e con cuelo el ghe fasea paura al Ghiro, sbatendo el baston de cuà e de là!!! Nialtri, co lo ghemo visto, se ghemo meravejià! Savivimo che el Ghiro và in giro de note. Ma no volivimo chel ne scapasse come el porzeleto rizzo!!! El Ghiro se jera ranpegà su par na pianta de cassia. Se vedea la bela coa chel gavea. Piena de pelo griso co on poco de maron. Silvano el gà fato on salto. El ghe gà ciapà la coa co tute dò le man: “Lo go ciapà! Lo gò ciapà!!!” el zigava. Inveze ghe xe restà le man piene del pelo de la coa del Ghiro. Ma el Ghiro no lo ghemo pì visto!!! Lora, el Bosco rivava fin ala mura dela Vale e de drio la jera tuta tera dura fa sasso!!! Prima che fusse scomizià la terza casa Fanfani, cuela ndove che semo ndà stare mi e la me famejia, la Via Borgolecco la jera ncora da sfaltare!
Mi me ricordo ben! Cuando che i perseghi se maurava, chi che podea conprarli, i li magnava anca par strada. E dopo i butava via l osso. Sì, l osso del persego! La Festa del Rosario la vien, lora come desso, al sete de Otobre. Me mama la fasea senpre el Scrocante. Come???!
Schei par conprare le mandole no ghin jera! Cussì me mama ne disea, a mi e a me fradelo Albano, de catar sù i ossi dei perseghi e anca cuei dei armelini. Ghe jera dù mesi de tempo! La Via Borgolecco, no sendo sfaltà, jera la pì fazile par vedere on osso de persego o de armelin caminando e vardando par tera!
Co ghe jera bastanza ossi, gavivimo on marteleto, e se metivimo a spacare i ossi de persego e de armelin. Me fradelo scomiziava par primo parché jera fazile farse male i dei! Pal giorno prima de la Festa del Rosario, me mama la catava senpre on poco de zucaro, e no sò come che la fasesse, ma chel scrocante che la fasea el jera cussì bon che mi no ghinò mai magnà de conpagno!!! Se sentia el maretto dele semenze de persego e de armelin. Ma che la parte de zucaro caramelizà che la smisiava co le semenze dei ossi, el ghe dava on gusto cussì bon al scrocante, che anca me fradelo Luigi, chel xe cuà in Australia co mi, el se ricorda ncora anca lù. E lù, sendo nove ani pì vecio de mi, el nava anca lù, col jera picinin, a catar sù i ossi, ma lù el nava sù par Via Vaccari, parché alora stavimo zò ai Giardinetti. La Via Vaccari la jera sfaltà fin ala Canonica. Pì vanti, strada Bianca col giarin da le parte, come la Via Borgolecco. El stradin el contava che no jera mia fazile catare el ludron par sfaltare le strade! Me fradelo Luigi, calche ano fà, col jera pì zovane cuà a Balgownie, ndove chel stava, el gavea provà a farse parfin le ‘Conposte’.
No savì mia cossa che le xe le ‘Conposte’???! Mi co jero toseto, navo su par Via Monte Grappa, che la scomiziava ndove che ghe jera l Ostaria col zugo de le Bocce, par nare in corte de me santolo Scarpareto. Me mandava me mama par tore dò ‘Conposte’. Me santolo el me fasea nare co lù soto ala tezza ndove che ghe jera la tina che gavea drento le ‘Conposte’, in mojia cola Graspia. Le jera dù tochi de na verza tajià a metà e ligà co na stropa de salgaro. La Graspia, la xe fata co la ua, dopo che la jera stà strucà col Torcio. Stiani ghe jera depì contadini che se fasea el vin par tegnerselo so la so Caneva. Lora cuasi tuti gavea el Torcio.
Dopo che l ua jera stà schizzà, la vignea messa drento ala tina nsieme co l acua. Cussì vignea fora la Graspia. I omini che nava a tajiare l erba sui prà col fero da segare, i se portava drio dò tre zuche piene de Graspia. La jera mejio de acua s-ceta!!! E la vignea doparà anca par fare le Conposte. Se tajiava le verze a metà. Se fasea on buso col ciodo e se pasava drento na stropa de salgaro. Se fasea on gropo e le se metea a bagno ntela Graspia. Le saria stà pronte dopo on paro de setimane. E che bone che le jera, cote col museto e calche coezza de mas-cio!!! » (continua) (Linus DownUnder – Lino Timillero, Coniston 26-01-2019)

Foto: Vecchi amici posano in via Borgolecco nel corso di una calda estate dei primi anni ’70 del Novecento (Cortesia Lino Timillero, rielaborazione grafica di Umberto Ravagnani).

Umberto Ravagnani

Se hai FACEBOOK e l’articolo ti ha soddisfatto metti MI PIACE
Oppure lascia un commento qui sotto…

BORGOLECCO STORY (2)

22 Luglio 2021, 17:01 22 Luglio 2021 0

[243] BORGOLECCO STORY (2)

LINO TIMILLERO – CONISTON – Nuovo Galles del Sud (AUSTRALIA)

Lino Timillero dall’Australia ci racconta, in alcune puntate, i ricordi della sua vita a Montebello, quando abitava nella zona di via Borgolecco.
« Cuindese metri pì vanti de la casa de Luigi, ghe jera el Fornaro, ndove che se nava tore el pan e anca el pan biscotto. On poco pì vanti, da che l’altra parte dela strada, ghe stava Arigo. El gavea na sorela e on fradelo, tuti dù pì veci de lù. Anca Arigo el zugava co nialtri. El jera magro come on cavreto ma el corea che nesun podea ciaparlo! Me ricordo ncora desso che so popà el piturava le case. El se metea tute le so robe, penei, busoloti de pitura e de solventi so on careto fato co dò rue de bicicleta, col manego da poder tacarlo ala so bicicleta, e con cuelo el nava a laorare. E xe capità che, na volta, par on paro de setimane, no se gà pì visto nissun! Arigo nol vignea pì a zugare e gnanca a scola. No se vedea pì gnanca so fradelo, so sorela, so mama, e so popà nol nava pì da nisuna parte col so caretin. Lora semo vignù a savere che tuta la famejia jera partia pal Venezuela!!! Se i xe ncora là, che el Signore el ghe vojia on poco de ben! Al giorno de oncò, el Venezuela el xe un dei posti pì bruti par stare on poco da Cristiani. E xe da on puchi de ani che la và senpre pezzo in Venezuela. Tuti, cuei che pole farlo, i zerca de scapar via dal Venezuela! E no xe che i possa nare a star tanto de mejio!!! El secondo de i me fradei, Gioanin, chel xe nato ntel mile novezento e trenta, (1930) el me contava che, ncora prima che mi nasesse, lù el nava a nparare a fare el fornaro. Lì dal fornaro de Via Borgolecco! Stiani, par magnare, se gavea da far de tuto: Gioanin jutava el fornaro e lù el ne dava el pan da magnare. Stavimo ncora ntela casa col porton de fero grande, so la destra dei Giardinetti. Par nar dal fornaro ala matina presto, ghe tocava nare par la stradela e sù fin ala Via Borgolecco. Me fradelo el me contava che la Guerra la nava zà vanti da on ano. El vecio fornaro el gavea on fiolo chel jera partio par la Guerra, ma no se savea gnanca ndove chel jera finio: forse in Grecia o forse in Africa. Cussì, pena che rivava le nove dela matina, el vignea mandà al Comune par vedare se fusse rivà calche letara del fiolo. So le scale del Municipio ghe jera senpre tanta zente a spetare… In tenpo de Guerra la nava male par tuti!!! E son anca vegnù a savere che el toco de Via Borgolecco, che dala Piazza riva fin ala curva ndove che ghe xe la ‘Casa dei Dalmaso’, no la se ciamà pì Via Borgolecco, ma Via Marconi. Cussì, par cuei che no i sà gnente del canbiamento, ghe sarà on poca de confusion!??? Ntel mile novezento e trenta sete (1937), a metà de chel toco de Via Borgolecco, ghe jera la ‘Casa del Fascio’. El diese de Setenbre, co xe stà fati i ‘Funeralì al Generale Giuseppe Vaccari, el ‘Feretro’ el jera rivà da Milano e messo drento ala ‘Casa del Fascio’. A Milano jera zà stà fate le ‘Onoranze’. In Via Borgolecco xe ndà a onorare el Generale Vaccari tuti i Montebelani che volea farlo. Dovemo nmaginarse che se jera in pieno ‘Periodo Fascista’! L’Italia gaveva l’“Impero”!!! E dala Via Borgolecco xe partio el Funerale, co cussì tanti Soldà, e Generali tuti nmucià che i sié cavai che tirava “l’Affusto” del canon co la cassa da Morto sora, i ciapava paura e no se jera boni a tegnerli chieti. Ala parte de drio dela ‘Casa del Fascio’, ghe jera el canpo de Calcio ndove che la ‘Gioventù Fascista’ fasea i esercizi e le marce. E anca i ‘Balilla’ e ‘Figli e le Figlie della Lupa’, Cuando??? Durante el ‘Sabato Fascista’!!! Ntel mile novezento e trenta nove (1939), me popà el xe stà “Richiamato”. El gavea zà cuatro fioi, Vittorio, Gioanin, Luigi e Adelino. E a Bepi ghe gà tocà nare in Albania parché l’Italia la xe ndà a “Invaderla”! Me vien da star male desso, solo a pensarghe! Come gavarala fato me mama a tirar vanti la famejia?!!! Dopo, tanto pì tardi, chel toco lì de Via Borgolecco, el servia anca par fare el ‘Mercà’ ogni Mercore dela setimana. Me ricordo mì. Co laoravo da ‘Pellizzari’, a mezogiorno navo casa a magnare. E pasavo infrà i banchi dei negozianti che scomiziava a metter via le mercanzie. Ghe jera ncora calchedun che girava par far calche afare, ma oramai cuel che jera stà vendù jera stà vendù!!! Me piasaria domandarghe a calche dun de cuei che semo nà scola nsieme se xe vero cuel che i me gà dito del nostro maestro. Silvano, Lorenzo, Luigi, Franco, Roberto, Walter, mi e tanti altri, gavivimo par maestro el signor Perticone. El ne gavea nsegnà cussì ben che, cuando che ghemo fato i esami de cuinta, i dù Maestri de la Commissione i volea Bocciarne tuti. Uno dei Maestri de la Commissione el jera so popà de Lorenzo, e che laltro, el jera me fradelo Gioanin, (nol jera pì nà a fare el fornaro…). Cuel che i me gavea dito, l’ultima volta che jero stà a Montebello, (1988), xe na roba da gnanca credarghe!!! El maestro Perticone nol gavea nissuna licenza Magistrale. La scusa la jera che la Guera e i bonbardamenti ghe gavea fato perdere “tutti li documenti”, “bruciati e dispersi” in Sicilia. Cussì, dala seconda clase, fin ala cuinta, nialtri tusiti de la Via Borgolecco e de le altre Vie del Paese, semo nà a scola dal maestro Perticone e no ghemo nparà n acca stracca. Anca lu, el maestro Perticone, co la so famejia numerosa, el stava de casa in Via Borgolecco. Sol apartamento dela casa Fanfani ndove che stava Roberto. Al piano tera. Co jerimo in cuinta clase, el Governo gavea deciso de fare la Scuola Media Obbligatoria. A Montebello, el Comune no gavea Insegnanti par le Medie. Cussì xe stà fata la VI^a Classe Mista, ‘Ad Interim’. Che volea dire: finché no se catava Insegnanti ed Edificio, se dovea fare la VI^a Mista. So sorela de Gianni Mazzocco, Dina, la jera una dele tose. La clase la jera n aula vizin a ndove che stava el ‘Bidello’ Conterno, so popà de Paolino. Zà lora i Conterno laorava a far Tombe e conpagnia bela. El fiolo pì vecio se ciamava Claudino, grande, coi caviji rizzi. Dopo ghe jera Luigina e Terenzio, naltra sorela e Paolino. Na volta, parché na Domenega gaveo fato barufa co un dei Fattori che stava de là del Casteleto, co semo nà scola al Luni, calche dun ghe lo gà dito al maestro. Lù, parché el se conosea col maestro Fattori, el gà mandà ciamare la Luigina Conterno parché la me portasse casa. Par castigo! Luigina la conoseva me mama da cuando ca stavimo vizin ai Giardineti, e anca mi che navo a zugare co so fradelo Paolino. Lora, co la gà dovesto portarme casa, stavimo so una de le case de Via Borgolecco, pasà la Ostaria col zugo de le bocce. (Desso lì ghe xe el “Vicolo Vivaldi” de risigo al muro dela casa “ristruturà”!) Me mama no la jera gnanca casa. Luigina la me gà dito de sentarme sol scalin e de dirghe a me mama che me fasea male la panza. E de no dirghe che el maestro el jera mezzo mato! » (continua) (Linus DownUnder – Lino Timillero, Coniston 19-01-2019)

Foto: Il lungo corteo al funerale di Giuseppe Vaccari in Via Borgolecco a Montebello (ora Via Marconi), il 9 settembre 1937 (elaborazione grafica di Umberto Ravagnani).

Umberto Ravagnani

Se hai FACEBOOK e l’articolo ti ha soddisfatto metti MI PIACE
Oppure lascia un commento qui sotto…

BORGOLECCO STORY (1)

17 Giugno 2021, 17:01 8 Agosto 2021 2

[238] BORGOLECCO STORY (1)

LINO TIMILLERO – CONISTON – Nuovo Galles del Sud (AUSTRALIA)

Lino Timillero dall’Australia ci racconta, in alcune puntate, i ricordi della sua vita a Montebello, quando abitava nella zona di via Borgolecco.
« Cari Amici, Par scomiziare la storia dei nialtri tusiti che stavimo nte la via Borgolecco, se gà da dire che jerimo cuasi tuti nati in tempo de Guera o calche ano dopo, 1943, ’44, ’45… Via Borgolecco la gò vista par la prima volta cuando ne gà tocà de fare San Martin. La me famejia la stava so la casa ndove che ghe xe el porton de fero grando, so la destra dei Giardineti. A chel tempo, no ghe jera gnanca na casa de là de la mura che scomiziava tacà al porton e la nava drita fin ala Stradela che desso la se ciama dele Carpane. De cuà ghe jera i Giardineti e de là de la mura ghe jera el Parco de la Villa.

Me popà el fasea el guardian e el giardiniere del Parco. Tanto par darve na idea, na volta, pena finio l’inverno, me popà el me contava chel jera drio sparpajiare on poco de luame vizin a ndove che jera sentà zò la Contessa co le Contessine. Co le gà sentio la spuzza, le gà dito: “Bepi ma sa falo?”, e me popà: “Son drio metere on poco de luame cussì l’erba vien sù bela. “E la Contessa:” Ma el vaga da naltra parte!” E cussi me popà el ga fato! Riva la bela stajion, l’erba scomizia a cresare. Bela,verde, via del posto vizin a ndove che se sentava la Contessa. E la se gà inacorta de la difarenza!!! Co xe pasà par de lì Bepi, la lo gà ciamà: ”Bepi, stano che vien el meta el luame ndove chel vole che se spostaremo nialtre.” E me popà: “Sì Signora Contessa…”. De San Martin del mile novezento e cuaranta siè (1946) semo ndà dala casa fin ala Via Borgolecco par le strade che ghe jera drento ala Villa. Sol carro tirà dal cavalo, ghe jera tute le robe de casa: leti, armari, careghe e la tola par magnare… Tuto cargà sù e ligà che no cascasse gnente. Prima che fusse fata la Via IV Novembre, ndove che la fà incrocio co la Via Borgolecco, ghe jera on porton grando, co la inferià che se verzeva da tute do le parte par far pasare i carri grandi. Da l’altra parte de la Via Borgolecco, ndove che desso se va sù par Via Manzoni, ghe jera naltro porton grando, conpagno de chelaltro, e se pasava par nare in corte da Bellini. Pena drento del porton, lì, sol canton, ghe jera la Vera da Pozzo che xe stà portà sui Giardinetti! E là xe stà portà anca i du pilastri de un porton. Chel altro porton, inferià e tuto el resto, el xe stà messo sola parte de la via IV Novembre, par nar drento a ndove che jera el Canpo dela vecia Casa del Fascio, che, finia la Guerra, xe stà conprà tuto dal vecio Zonin.
Nialtri ne tocava far San Martin parchè i Paroni dela Villa e de tuta la tera, poco dopo finia la Guerra, i gavea vendù fora tuto! Da la mura de Via Borgolecco fin in zima ala Via Pegnare e ala Via San Francesco de desso, e dala mura dela vecia Villa Casarotti fin ala mura ndove che ghe xe Via Volta desso. Tuto vendù!!! El Parco al Moro Fiasca che dopo el ga vendù al Comune. La Villa vendù a tochi a tri cuatro paruni. La tera sù pal monte ai fradei Gamba. De sti fradei, uno nol jera gnanca sposà e chelaltro el gavea cuatro fioi. La casa ndove che ndavimo in afito so la Via Borgolecco, la jera la ultima, passà l’ostaria ndove che jera el zugo de le bocce. La jera tacà co altre tre case co tre famejie difarenti. Dosento metri pì vanti ghe jera altre tre case una tacà l’altra. Là ghe stava me zia Veronica. Mi gavarò vudo du ani. El San Martin xe el me primo ricordo. Poco pì de on ano dopo che stavimo là, me go inacorto che ghe jera na toseta che la jera senpre casa da so nona. Ghemo scominzià a zugare nsieme. La se ciamava Anna Rosa. Cuela che, diventà Signorina, la se gà sposà co Bruno, so fradelo de Silvano e de Sergio (anca de Sandro, ma el jera massa picolo!).
Ndove che la Via Borgolecco la fa come na S, e so la seconda curva scomizia la Via Verdi, là nava vanti la mura co na stradela. Ntrà la mura e l’orto de la casa de Silvano, ghe sarà stà cuatro metri. De drio ala casa de Silvano ghe jera ncora case. Là ghe stava i fradei Filotto. So la curva de la strada ghe jera el rubineto de l’acua. Tuti se nava tore l’acua al rubineto cole sece e col bigolo! El rubineto el vignea sù da par tera, tacà a on toco de piera alta fa mi e sagomà rotonda par sora. Al Inverno bisognava ricordarse de assar verto on poco l’acua parchè se nò la se gavaria jazzà e no saria pì vignù fora acua finche no la se disgiazava! Naltro rubineto conpagno, el jera so la curva ndove ca scomiziava la Via Monte Grappa. Là, co jero pì grandeto che podevo portare el bigolo senza far tocare le sece par tera, navo anca mi a tore l’acua. Me mama tacava le secie sora el seciaro e ghe jera la cazza de rame par bevare. Naltro rubineto conpagno el jera poco distante de ndove che desso ghe xe la Vera da Pozzo sui Giardinetti. Là, co navo da me fradelo Vittorio chel stava ntela corte dei zeolari, zerte volte navo torghe l’acua par me cognà Flavia parchè Giorgio el jera ncora picinin e me nevoda Marianela no la jera ncora nata. So la stradela ndove che stava Silvano, se zugava dele bele partie de calcio. Se metea du sasi par tera ndove che scomiziava la stradela, par fare le porte, e altri du sasi ndove che finiva le case ala parte de cuà de la mura.
I fradei Filotto tirava fora la bala, se fasea le scuadre e se zugava fin che vignea ora de nar magnare ala sera! Luigi el stava on poco pì vanti, pena che se ndrizava la strada. Lù e so fradelo Gaetano, no i zugava tanto co la bala, ma i jera boni a zugare la ‘Porcola’. Par zugare, la ‘Porcola’ jera stà fata de on toco de manego de spazaora. On tochetin curto (diese zentimetri) co le punte par farlo saltare e baterlo col jera pararia doparando on toco de manego lungo poco manco de on metro. Ndove che ghe jera el rubineto, se metea el saso groso chel fasea de bota. Chi che scomiziava par primo, el gavea da batere la ‘Porcola’ al volo. Se calche dun la ciapava par aria cuel che la gavea batù el jera zà fora. Lora bateva chi che gavea ciapà la ‘Porcola’. Ma el pì bravo a zugare a ‘Porcola’ el jera Andrea, so cugin de Luigi. So la Via Borgolecco, verso el Monte Castello, ghe jera na mura alta, dal Porton de la Corte de Bellini, fin ala mura vizin ala casa de Silvano. E da lì, zigazagando, fin sù ndove che desso ghe xe Via Pegnare.
Prima che fusse scomizià la strada nova, (Via IV Novembre) xe stà scomizià a fabricare le prime do Case Fanfani. In fra mezzo, desso ghe xe Via Pedrollo. Dopo xe stà fabricà le case par i mpiegati del Comune: do case par i Maestri e do case par chi che laorava pal Comune. Calche ano dopo, xe stà fabricà la terza Casa Fanfani, dala parte de la curva dela strada. Là, dopo che el paron de la casa ndove che jerimo in afito ghe gà mandà el sfrato a me mama, semo ndà a stare nialtri. No gavivimo altre speranse. Me popà el jera in Svizara a laorare. Me mama la disea sù tarzeti tute le sere, e anca nialtri fioi. La pianzea, e la disea: “Ne tocarà nar dormire soto al Ponte… Madona jutene ti!” Col secondo San Martin, so ndà a stare ncora pì vizin a Luigi e Silvano e Andrea. So le altre do Case Fanfani, ghe stava Roberto so una e Guido stava so chelaltra. De tosete, a parte Anna Rosa, co jero pì picolo, co l’età che gavivimo, nessun savea se le jera al mondo. Le vedivimo co le nava a scola, in Cesa e ale Procesion, ma pal resto, lì ‘ntorno no me ricordo che ghin fusse! Caminando drio la Stradela dele Carpane, se vede ncora la mura vecia dela Villa. On pochetin pì bassa. E la và sù fin che la fà el giro co la riva al Capitelo e dopo la và vanti fin al muro de la vecia Villa, con calche porton par le case che ghe xe là desso. » (continua) (Linus DownUnder – Lino Timillero, Coniston 15-01-2019)

Foto: Uno scorcio di Via Borgolecco a Montebello alla fine degli anni 40 del Novecento. (Elaborazione grafica di Umberto Ravagnani).

Umberto Ravagnani

Se hai FACEBOOK e l’articolo ti ha soddisfatto metti MI PIACE
Oppure lascia un commento qui sotto…

I TRI FRADEI DA MONTEBELO

12 Novembre 2020, 17:01 11 Novembre 2021

⁕ AREA RISERVATA ⁕

Per visualizzare questo articolo è necessario registrarsi o accedere con le proprie credenziali. La registrazione è semplice e gratuita: dal menu in alto a destra scegliere AREA RISERVATA → REGISTRAZIONE, inserire i propri dati e premere su REGISTRAZIONE. In breve tempo verrà approvata la vostra richiesta e, quindi, potrete entrare nell'area riservata con ACCEDI usando l'indirizzo e-mail e la password scelti nella fase precedente.