I TAGLIATORI DI CANNA

[121] LINO TIMILLEROCONISTON – Nuovo Galles del Sud (AUSTRALIA)
I TAGLIATORI DI CANNA

Β« El Sig. Scalzotto, el scriveva le so storie in dialeto e nialtri in giro pal mondo podivimo lezerle. LΓΉ el ne contava dei mestieri de na volta. El Moleta, el Marangon, el Strazaro, el Maniscalco e altri ancora… Anca quΓ , in Australia, ghe xe on mestiere che no lo fΓ  pΓ¬ nesun: el tajador de cana da zucaro! Quanti tusi da la nostra Provincia xe vegnesti quΓ , proprio par tajar la cana, no gavarΓ¬ mai gnanca na scianta de idea. Se i gavese savudo quanto che jera duro β€œtajar cana”, de sicuro no i saria gnanca partii! Adeso ghe xe le machine… ma alora…! La storia che ve conto β€˜sta volta, la xe quela de du fradei da Valli. Penso che la vaga ben anca par i soci de la sezion dei Vicentini nel Mondo de Valli del Pasubio.
I du fradei se ciama Dalla Pozza, Valentino e Matteo, partii dal paese ai primi del β€˜50. Quando che i nostri emigranti rivava qui, pena finia la seconda guera mondiale, β€˜ndava quasi tuti al Norte Quinseland! Tra TausviI (Townsville) e Chens (Cairns), che vuria dire vizin al Tropico de Capricorno. ProvΓ¨ vialtri a partire da Valli, o da Recoaro, o da l’Altopian de Asiago, suito dopo la Befana, e sentarΓ¬ che difarenza! Matteo el jera vegnΓΉ quΓ  nel β€˜52. So fradelo, Valentino, el jera xa quΓ , ma a lΓΉ ghe gΓ  tocΓ  spetare quasi un ano parchΓ¨ i gavea sbagliΓ  de farghe na carta. Prima de partire, el se gavea ingrasΓ  on poco, e so mama la jera contenta parchΓ¨ la vedea che el fiolo el saria almanco partio pien de salute. Fin che’l jera so la nave, Mateo el xe sta sfortunΓ  parchΓ¨ ghe fasea male el mare e nol podea magnar tanto: podΓ¬ imaginarve… El xe riva a Silkwood e a spetarlo ghe jera so fradeto col β€˜Farmista’, (qua l’azienda Agricola se ciama Farm=farma, el paron el xe Farmer=farmista, el canpo da tajare se ciama paddok= padico). La cana la gΓ  on giro che la crese, la maura e la xe pronta in tri ani, da quando che i mete xo i β€œgropi” a quando che i la taja. Par quelo el laoro el xe continuo; pianta, crese e taja tuto el tempo de l’ano. Co i gΓ  scomiziΓ  a laorare, i ghe dΓ  on cortelaso da cana che el jera lungo quasi na iarda = tre piΓ¨ = 75 cm. Da na parte el jera lama de fero e el resto manego. In prizipio, Mateo nol jera bon de starghe drio. I jera na squadra de quatro: prima i dovea pareciare i β€œFaier- breich” ch’el saria on strozo largo on du metri, dopo, i ghe dava fogo a le foie de la cana pi basse e seche, cusi scapava via i zorsi grosi e i sarpenti velenosi! El sarpente Taipan el xe pi velenoso de tuti i sarpenti: gnanca meza beconΓ , e te si xΓ  morto! Dopo, in quatro par padico, i scomiziava a tajar la cana. Uno drio che l’altro, on poco sposta de fianco, come quando che se tajava l’erba par fare el fen par le vache. La cana, man man che i β€˜ndava vanti, i la butava xo tuta conpagna parchΓ¨ i gavea da tajarghe tute le zime e meterla sui vagonzini che i corea so na ferovia picola mesa zΓ² a man anca quela. La cana la podea rivare anca quatro metri alta e grosa come on tubo da na incia e meza: inch=police.
I laorava a cotimo, on tanto al vagonzin che i tegnea quasi quatro tone par uno. Co jera caldo, i fasea 6 ore ala matina, dale quatro ale diese, dopo i β€˜ndava a magnare, e i tacava de novo dale do fin ale oto de sera. Quando che le jornate le se scurzava, e fasea manco caldo, i laorava dodese ore drio fila; i se fermava a mezodΓ¬ par magnare on bocon in presia e via, suito a laorare. Però… sabo e domenega, casa. La intorno, ghe jera paesi che se ciamava: Gordonvale, lngham, Silkwood, e Innisfail, el paese pi grando. La domenega i β€˜ndava a Mesa. Ghe jera Padre Orsi (Scalabriniano) che el disea Mesa metΓ  in lnglese e metΓ  in Italian, e ghe jera cusΓ¬ tanti italiani che ghe gΓ  tocΓ  slungare la Ciesa parchΓ¨, se no, co pioveva se bagnava metΓ  gente. E co pioveva, el pioveva ben!!! Par forsa!!! La cana la gΓ  bisogno de acua. Se no la gΓ  acua no la crese!!! Il padico i lo dividea a tochi grandi come canpi e co i tajava la cana, el jera on canpo drio che l’altro. Dopo tri misi, Mateo el ghe stava ben drio a chialtri e zerte volte el rivava lΓΉ par primo in fondo al canpo. LΓΉ el jera xa drio guzarse el cortelaso cola lima che ghe jera lΓ  in fondo, prima che rivase i altri. PerΓ², nol jera pi graseto. El se gavea fato magro come on ciodin. LΓΉ e so fradelo, i ghe gavea mandΓ  a so mama na fotografia fata insieme. So mama, a vedarli tuti dΓΉ magri come ciodini, la se gavea disperΓ  parchΓ¨ la pensava che i fuse malΓ  tuti dΓΉ. lnveze, laorando cusΓ¬ duro, i gavea perdesto el cician, ma i gavea trovΓ  le sterline australiane. Mateo el se gavea pagΓ  i debiti e el ghe gavea zΓ  conprΓ  la ticheta (biglieto) par far rivare la morosa. El farmista dei dΓΉ fradei Dalla Pozza, el se ciamava Fontana e el vigneva da Malo. El jera rivΓ  a Silkwood prima del 1930, forse par scaparghe via al fasismo. Anca lΓΉ, el gavea scomiziΓ  a tajar la cana. Dopo, co’n poche de sterline, el se gavea conprΓ  na farmeta; pagΓ  quela, el ghin gavea conprΓ  naltra, e vanti cusΓ¬, fich’el xe diventa paron de la farma ch’el gavea deso, cussΓ¬ granda che no se podea vedere dove che la finia e ghe ocoreva senpre pΓ¬ de 250 omini par starghe drio a tajar la cana. Quando che ghe ocoreva omini, el zercava senpre omini de la provicia de Vicenza, o Trevisani e Friulani. Se el podea catarli, el jera contento, parchΓ¨ el savea ben che, almanco par on par de ani, i gavaria tajΓ  la cana par lΓΉ. Mateo e Valentino i gavea sentio dire che a Port Kembla, vizin a Sydney, i zercava omini parchΓ¨ ghe ocoreva tanta man de opera par la Steelwork. E i gavea anca sentio dire da β€œradio scarpa”, che jera rivΓ  na Inpresa dal’ltalia, e anca quei zercava operai. I se ga parlΓ , I ga discutesto, e β€˜sta volta, prima xe partio Mateo. Dopo tri dΓ¬ e tre note, el xe rivΓ  col treno a Sydney. El gΓ  dormio in stazion. La matina drio el ga catΓ  el treno che β€˜ndava a Port Kembla, el se ga trovΓ  el β€œJob” (lavoro). Dopo xe rivΓ  so fradelo, xe rivΓ  anca le done. Adeso, dopo tuti i ani che xe pasΓ , tuti dΓΉ i ringrazia el Signore, parchΓ¨ i xe ancora quΓ  coi fioi, le fiole e tanti nevodeti. Β» (Lino Timillero – Vicentini nel mondo – Dicembre 2015)

Umberto Ravagnani

Figura: Tagliatori di canna in Australia. Moltissimi italiani hanno lavorato duramente in queste piantagioni.

Nota: Lino Timillero ci informa che Β« Valentino Dalla Pozza Γ¨ deceduto sei mesi or sono, ultra novantenne. Matteo Γ¨ ancora con noi. Con i due Fratelli ho lavorato per tanti anni. Ambedue furono nel primo comitato dei Vicentini di Wollongong! Se tu ricercassi on-line “Luciano Dalla Pozza”,Β  troveresti che Γ¨ uno Specialista in Oncologia (Leucemia nei bambini). Il Dott. Luciano Γ¨ figlio di Matteo!!!Β Β»

Nota: Per chi Γ¨ interessato, da parecchi anni Γ¨ stato istituito un premio letterario per scrittori di testi Poesia e Prosa nei dialetti di Lingua Veneta: si chiama “Premio letterario Raise 2019” e si tiene ad ArquΓ  Polesine nel mese di settembre. Anche il nostro Lino Timillero vi ha partecipato l’anno scorso con grande soddisfazione. E’ possibile scaricare qui il Bando 2019.

AI LETTORI:
Quanti volessero collaborare per la redazione del notiziario con articoli o segnalare argomenti di particolare interesse, notizie, curiositΓ , proverbi locali, foto, cartoline d’epoca, etc., sono invitati a mettersi in contatto con l’Associazione.

Se hai FACEBOOK e l’articolo ti ha soddisfatto metti MI PIACEΒ 
Oppure lascia un commento qui sotto…Β