I CACHI E I FLYING-FOX

[232] I CACHI E I FLYING-FOX

LINO TIMILLEROCONISTON – Nuovo Galles del Sud (AUSTRALIA)


Nel nostro appuntamento mensile, Lino Timillero dall’Australia ci racconta di una ‘chiacchierata’ con un amico di Velo d’Astico, anche lui emigrato in quel lontano Paese:
Β« Cari Amici, a gΓ² da contarve ca me son catΓ  β€˜ncora co cuel sior da Velo d’Astico. β€˜Stavolta, l’ocasion xe stΓ  na reunion dei Alpini. El Grupo de Wollongong xe β€˜ndΓ  fin a Sydney, e mi me son trovΓ  lΓ  par far do ciacole co la conpagnia. Zerte volte, la conpagnia la te tira su de morbin mejio ca on par de biceri de vin bon! Dopo verse dito come ca se stava e conpagnia bela, me son inacorto ca el gavea calcossa sol stomago, come on gropo ca nol ghe β€˜ndava xo! Voleo dimandarghe cossa ca ghe jera, ma go spetΓ  par vedare se, pian, pianelo, el se disgropava ciacolando. Come ca fusse gnente, el me dimanda sa go mai visto on β€˜Flying-Fox‘?1 β€œMi no.” ghe digo, β€œparchΓ©?” β€œI xe drio a farme diventar mato” dise β€˜ncora lu. β€œVarda ca i go sentii nominare, ma no i go mai visti” ghe digo. β€œPapastrji! I xe papastrji. Ma grandi! Grandi! Se no te sΓ© cossa ca i xe, cuando ca xe sul’inbrunire, e t’in capita un cal te svola vizin, el te fa vignere on colpo! β€œMa cuanto grandi sei?”, ghe dimando mi. β€œI pol rivare anca fin a on metro e meso co le ale sverte! Te imaginito che bestia? Co la pele come on gato griso, muso nero da β€˜possum’, col pelo color de la volpe torno al colo, e le ale nere, ca de note gnanca no i se vede! β€œ(el ’possum’ el vΓ  in giro de note anca cuelo, ma co cuatro zate el xe come on gato).
β€œMa parchΓ© sei drio farte diventar mato?” ghe dimando. (Tanto par capirse par Talian, el se dise: β€˜flain fox’, ca vol dire β€˜volpe volante’). β€œVizin a ndove ca stΓ² de casa, ghe xe el β€œLane Cove National Park”. Sto Parco el xe cussΓ¬ grando ca te pare ca nol finissa pΓ¬! El va drio al β€˜Lane Cove River’, da indove cal rio scomizia, e fin cal va a finire rento al β€œParramatta River” e te si rivΓ  nte la β€˜Baia de Sydney’, cuasi soto al β€˜Ponte’!
β€œI β€˜Flying-Foxes’ i me fa diventar mato parchΓ©, se no stΓ² tanto tento, i me magna fora cuei pochi de perseghi e bronbe ca go de drio e davanti de casa! Lo seto cossa ca vol dire? Te pianti xo i persegari. Te pianti xo le bronbare, ma no la xe gnanca cuela. Prima te ghe da nare a catarli! Ndove veto? A Narellan? A Malgowan? Cuei xe i posti cuΓ  vizin, ndove ca ghe xe le β€˜Nursery’ [vivaio] pΓ¬ bone. LΓ  se trova de tuto: fiori, piantine de verdure, e anca piante de castagnara, par chi ca le vole. Ma mi, parchΓ© zercavo on par de piante de cachi, me ga tocΓ  ndare fin a β€˜Bowral’. Seto ndΓ² ca xe β€˜Bowral’?” β€œSΓ¬. Xe vizin a Berrima, ndove ca ghe xe la fabrica de β€˜Cemento’,” ghe digo. β€œA go tanto tribolΓ  par far cresare i cacari. Le bronbare e i persegari, i ga fato presto a tacare e a fiorire. Ma i cacari no i volea saverghene. I cresea a du ramiti e na dozena de foije al ano. Dopo cuatro stajon, a me son dito ca li gavaria cavΓ  su se no i se metea a far fiori. Co i gavea scomisiΓ  a perdare le foije, le gavea on colore propio belo rosso, cuasi come le foije de le visele de ua crinta, te ricordito? Li gaveo inluamarΓ  ncora. Ala fine de Lujio gavea piovesto bastansa e, come se i cacari i me gavesse sentio, i gΓ  butΓ  fora i fiori!” β€œE alora, te sarΓ© contento, no.” ghe fasso mi. β€œContento par chel poco de fioridura si, ma el primo ano no xe vignesto fora gnanca on caco. Tuti i fiori xe cascΓ  par tera! E ghemo magnΓ  anca puchi perseghi parchΓ© xe sta lora ca me go inacorto dei β€˜Flying-Foxes’. I vegnea su dal Parco, da ndove ca i se tacava rento le caverne. Se un stava tento, el li vedea vignere su come ca se vedea girare i s-ciapi de storlini ca rivava xo da la Pria ForΓ co jero ncora a Velo. Ma tanti, da ciapar paura! E le bronbe, me ga tocΓ  magnarle meze crue parchΓ© no saveo ndove nare par conprare le rete da metarghe sora le piante. L’ano dopo, na cariolΓ  de luame par le cuatro piante, gira de cuΓ  e de lΓ  par catare le reti, e parecia paleti e tubi par cuerzere le piante. Si, jero in pension, ma no voleo mia diventar mato par colpa dei β€˜Flying-Foxes’!
A la me dona, i cachi i ghe piase tanto! Par Inglese i se ciama β€˜Parsimon’. Ma no xe ca sin cata tanti, al β€˜shop’, e i costa anca cariti, e gnanca tanto boni se xe par cuelo.” Gino el vardava in giro ca me parea cal zercasse calche dun ca el conosea. On puchi de Alpini i se gavea inmuciΓ  sora al palcheto ndove ca ghe jera cuel ca sonava la Fisarmonica, e i gavea scomiziΓ  a cantare le canzon dei Alpini! Par prima: β€œSul Ponte di Perati”. β€œChi zerchito” ghe dimando? β€œSon drio vardare sa passa cuel Abruzese ca me gΓ  mostrΓ  ndove nare a catare le rete par le piante. Anca lu, el podaria dirte come ca i xe i β€˜Flying-Foxes’ parchΓ© xe stΓ  lu a sveiarme fora!”
L’Abruzese nol se vedea e Gino el se ga messo a contarme de come ca le ave le ndava torno ai fiori dei cachi. β€œGheto mai vardΓ  come ca i xe fati i fiori dei cachi? No? I xe come canpanele bianche e picole, col risvoltin con zincue, siΓ© puntine. Te dovarissi vedare come ca fa la ava a nar rento sol fiore par ciuciarlo. La se infila drento a la canpanela co la testa, e la se tira sΓΉ suito co le zatele. La va su fin inzima ca se vede fora apena el de drio, tirandose rento co le ali e tuto. Co la gΓ  finio con chel fiore, la se urta fora, e la svola suito drento a naltro fiore come ca la fusse drio a laorare a cotimo! E cussi fa anca tute chel’altre ave!!! Na maraveia! La prima volta ca jera vignesti fora i fiori sol cacaro so sta la a vardarli parchΓ© no li gaveo mai visti. Le ave le ghe nava in giro ma mi no ghe faseo tanto caso. Dopo na setimana go visto ca i fiori scomiziava a cascare par tera. Saveo ca se cascava el fiore dal Limonaro, cascava anca el limon ca saria dovesto vigner fora da cuel fiore! Inveze, dal cacaro el fiore el se fasea da bianco a maron e el cascava ma el caco el jera xa su, restando tacΓ  al ramo de la pianta par cresare par on siΓ© mesi e farse zalo e pronto da esar magnΓ ! Eco, vidito, dopo tuto el laoro mio e de le ave, no posso mia assarghe a cuei β€˜can dal’ostrega dei β€œFlying-Foxes” a magnarme tuti i cachi! Ti, cossa ghin disito?” β€œCossa voto ca tin diga mi! A me ricordo ca al me paese, ghe jera piante de cachi ndove ca i gavea fabricΓ  le case β€˜Fanfani’. Ma chi ca le gavesse piantΓ , o parchΓ© proprio cachi, a no lo so mia seto? A me ricordo anca ca i jera picoli e no i se maurava mai!” E lu, Gino, suito el me fa: β€œEl paron dela β€˜Nursery’ el me ga sicurΓ  ca la cualitΓ  de i me cachi la xe la mejio! E i xe anca bonorivi! Sa semo ncora vivi, par la fine de Marso, o i primi de Aprile, co se cataremo ncora, te li farΓ² saiare!” β€œParola?” ghe fasso mi. β€œParola”, me dise lu, β€œe no ghe sarΓ  β€œFlying-Foxes” o chialtri disgaziΓ  de β€œPossum”, ca i me possa fermare.” β€œBravo Gino, cussi se ga da metarla!!!”
E se ghemo bevesto naltro bicere de vin, magnandoghe drio tre cuatro β€˜cashews’ [anacardi], ca le xe pΓ¬ bone de le bajiie, tanto, Gino el saria ndΓ  casa co la machina del Abruzese, e mi, col bus dei Alpini! Β» (Linus DownUnder – Lino Timillero, Coniston 14-11-2017)

Note:
1) I Flying-fox (volpi volanti) sono pipistrelli giganti, mammiferi nomadi che viaggiano su e giΓΉ per la costa orientale dell’Australia, principalmente lungo la pianura orientale.

Foto: I Flying-fox, anche se un po’ paurosi a vedersi, sono animali intelligenti e straordinari. Questi esseri peculiari aiutano a rigenerare le foreste e mantenere sani gli ecosistemi attraverso l’impollinazione e la dispersione dei semi. È una specie migratrice e nomade su cui molte piante e animali fanno affidamento per la loro sopravvivenza e il loro benessere. (Elaborazione grafica di Umberto Ravagnani).

Umberto Ravagnani

Se hai FACEBOOK e l’articolo ti ha soddisfatto metti MI PIACEΒ 
Oppure lascia un commento qui sotto…