[188] LINO TIMILLERO RACCONTA
Di LINO TIMILLERO – Coniston (AUSTRALIA)
LINO TIMILLERO, nostro compaesano emigrato in Australia nel 1967, ci ha inviato questo interessante articolo sui Circoli e le Associazioni di Italiani in Australia e nel mondo:
Β« El mese de Agosto de stβInverno passΓ , gaveo cuasi finio de vangare lβorto par pareciare da metar xo on poco de luame. La matina jero βndΓ da βBunningβ a conprare cuei sachi de βFertiliserβ xa prunti: on poco de vaca, de piegora e anca de schiti de galina. GΓ² scominziΓ a smissiare tuto co la teraβ¦ e gΓ tacΓ a piovare! VardΓ¨ ca no me son mija sbaljΓ ! CuΓ in Australia, el mese de Agosto, el xe come cal fusse Febraro, in tuta lβEuropa, lβAmerica e conpagnia bela! Jera cuasi le do. Me mojere la me ciama e la me dise de narghe a inpostare na letara. La casseta de la Posta la xe lΓ¬ a dΓΉ passi. Me togo sΓΉ lβonbrela, verzo el βtilt-a-doorβ del garage, e vago sΓΉ sola pontareta par metare la letara βnte la casseta de la Posta: cuΓ le xe tute piturΓ de Rosso.
On poco pΓ¬ vanti, finisse la pontara, e se pol vedare el mare. Vago sΓΉ, tanto par vedare come cal jera el tenpo. No se podea gnanca vedare el mare, cal xe lΓ¬, poco distante. Nuvole e Oceano, i jera tuta na confusion! E vignea xo na pioveta ca la disea: xe inverno, e te fasso vedar mi cuanto ca tiro vanti! Ma cuΓ a Wollongong, semo fortunΓ parche no jazza mai!!! Da nialtri, el Meteo, el xe comandΓ dal Polo Sud. LβAntartico, el xe on poco pΓ¬ soto de la Tasmania, e dal Polo in sΓΉ, no ghe xe gnente in mezo! Xe cuando ca riva el Nigno o la Nigna, ca le robe le se mete a βndare par traverso. Co ghe xe el primo el xe massa suto, e no piove par setimane; co se soto la seconda, la Nigna, lora el piove anca on fiΓ massa! LβOceano del South Pacific, el va da lβAustralia al Cile e in mezo no ghe xe gnente.
Sicome ca el piovea, so βndΓ soto casa a farme na docia in pressia. Me go vestio e so βndΓ sΓΉ in casa par darghe na ociΓ al βGiornale di Vicenzaβ so lβInternet. VardΓ cuelo, me taco so lβEnte ‘Vicentini nel Mondoβ, parchΓ¨ me jera vegnΓΉ in mente de vardare cuante βAssociazioniβ e βCircoliβ ghe xe in giro pal mondo! Savio cuante? 42!!! CuarantadΓ²!!! Tante!!!
Tirando via le dΓ² ca xe in Italia, la pΓ¬ parte, le xe so lβEmisfero Meridionale. CiΓ²!!! Ondese in Brasile!!! Sete in Australia!!! Do in Argentina! Una in Venezuela, una in Uruguai e una in Sud Africa! Se vulΓ¬, provΓ¨ a vardare anca vialtri!!! Me go meravejiΓ ca du βCircoliβ brasiliani e un argentin, i gΓ el βsiteβ so lβInternet, ca spiega tuto cuel ca i farΓ in tei dodese misi de lβano. A parte el fato ca nialtri disemo Argentina e luri, i Argentini, i dise Arghentina parchΓ¨ i parla βCastiglianoβ, xe da dirghe: Bravi!!! El βCircoloβ de Buenos Aires el gΓ parfin on βGruppo Teatraleβ de nome βLuigi Meneghelloβ! E ghe xe anca el βCircoloβ de Cordoba in Arghentina!
El xe pΓ¬ sΓΉ, verso le Ande, distante da la Capitale, ma come ca dise luri, nel Centro Geografico de lβArghentina!!!
De preciso, no sΓ² cuanto ca sia distante Cordoba da Buenos Aires, ma vardando la cartina, me par cal sia come da Sydney a Melbourne. Cuasi 800 (otozento) km. E son vegnΓΉ a savere ca dΓΉ fradei da Cordoba, i gΓ zugΓ el calcio co la scuadra de la U.S. Montebello, la scuadra de calcio del me paese! A cuei tenpi, jera Presidente de la U.S. Montebello el Sior Gioanin, un dei tri fradei da Montebelo ca mi ve gΓ² contΓ on poca de la so storia.
Vedio, la saria na gran bela roba se calche dβun de Buenos Aires,o de Cordoba, o anca de Montevideo, i ne contasse cossa ca ghe xe e come ca la vΓ da chele parte lΓ !
CuΓ in Australia, mi gΓ² vudo la fortuna da essar stΓ a trovar tuti i βCircoliβ! O par na storia o par naltra, so βndΓ fin a Adelaide, el βCircoloβ pΓ¬ distante da Wollongong. Forse, βndando vanti col tempo, saltarΓ fora on βCircoloβ anca a Perth, in Western Australia, e, magari, un a Hobart, in Tasmania. Se el bon Dio el volarΓ , saremo βncora cuΓ ! Ma sarΓ tanto difizile parchΓ¨ anca nialtri βVicentiniβ, ca se vojia o no se vojia, semo drio diventar veci, e co se diventa veci, no se xe pΓ¬ boni de far cuel ca se fasea da xovani! E se i xovani no i se fa vanti, finirΓ anca calche βCircoloβ. Ma no stemo lΓ¬ a parlar de brute robe. Tiraremo vanti come ca se podarΓ , e la Madona de Monte Berico, speremo ca la ne jiuta, ma Tanto!!!
Ve digo la santa veritΓ , par mi, Myrtleford, el primo βCircoloβ fondΓ in Australia, el xe cuelo ca me piase de pΓ¬ de tuti! El paese el xe in Victoria, de lΓ del confine col New South Wales e βvanti on zentenaro de km., e fora via de la Freeway ca va a Melbourne. In giro ghe xe tanti monti e on bel fiume cal se fΓ cativo col piove tanto! LΓ se cata βncora i magnari come ca i fasea na volta! Ghe xe Vicentini ca i xe lΓ da tanti ani. Fameie ca jera rivΓ lΓ dal β20 e dal β30. Tradision mantegnΓΉ vive da βlora, par generasion ca gΓ inparΓ a caminare e a parlar dialeto, tuto insieme, e a rispetare tuti e tuto! E sicome ca i jera tanti, i se fa rivare da lβItalia parfin la Prugna, chel bon licuore ca me mama me mandava a conprare da Zonin, co jero toseto. Par no parlare de le soprese e dei saladi! I fa su el mas-cio come cal fasea su i saladi el mazin ca vignea a far su el mas-cio a casa nostra depΓ¬ de sesanta ani fa! Cuando ca go sajiΓ na mortadela fata lΓ , so restΓ a boca verta: come cala fusse sta fata su la setimana prima a casa de me mama! E co se vΓ in giro par Myrtleford, ghe xe el giarin de fianco de le strade, come a Montebelo o a Villaverla. Vialtri βdesso dirΓ¬: βParchΓ¨ Villaverla?β. El signor Revrenna, Presidente dei βVicentiniβ de Myrtleford par tanti ani, el xe nato a Villaverla! E a Cordoba? Come se le le robe de na volta a Cordoba? E a Buenos Aires? E a Montevideo?
βDesso ca ghe xe el Papa Italo-Arghentino, parchΓ¨ calche dun no ne conta come ca vΓ le robe da vialtri in Sud America, in Sud Africa e anca da le altre parte, βndove ca ghe xe βVicentiniβ.
Sol nostro caro Periodico, vien messe su le novitΓ dei Circoli come ca le ghe vien riportΓ a luri, ma nialtri in giro pal mondo, no savemo mia cossa ca ghe xe tra Cordoba e Buenos Aires.
A Myrtleford, na volta i laorava tanto sol tabaco. βDesso cuelo el xe cuasi finio e i se ga messi a tirar su visele, castagnare, nogare e parfin chela roba ca i dopara par fare la Bira!
A Wollongong, la βSteelworkβ desso la gΓ gnanca metΓ de tuti omini ca i gavea na volta. Le Inprese taliane le xe diventΓ australiane o le se stΓ vendΓΉ! Port Kembla la xe drio riprenderse desso, dopo ca tante Industrie ca fasea anca porcarie tra fumi e βlicuamiβ ghe gΓ tocΓ de sarar su e spetare de essar licuidΓ e anca pezo!
Ma se tira vanti. βDesso, da veci, ma senpre zercando de star su col morbin!!!
(Linus DownUnder – Lino Timillero Coniston 15-10-2015)Β Β»
Umberto Ravagnani
Foto: Lino Timillero a Montebello il 19 settembre 2019 mentre ci racconta della sua esperienza in Australia. A destra Ferruccio Zecchin attuale Presidente di “Vicentini nel Mondo“. In secondo piano Maria Grazia Maggio Presidente degli “Amici di Montebello” (Foto Adelino Fioraso).
Se hai FACEBOOK e l’articolo ti ha soddisfatto metti MI PIACEΒ
Oppure lascia un commento qui sotto…