I TRI FRADEI DA MONTEBELO

[207] I TRI FRADEI DA MONTEBELO
Quando in Australia il dopolavoro era tirare ai conigli con il Winchester


LINO TIMILLERO, emigrato in Australia nel 1967, ci allieta, questa settimana, con un nuovo articolo su Toni e Maria e altri personaggi della sua giovinezza a Montebello:

« A jerimo restΓ  che Joe (GiΓ²), el toseto de Toni e Maria el nava ala scola catolica e le suore le jera drio a pareciarlo par fare la Prima Comunione. Se ve ricordΓ¨, tanti ani fΓ , bisognava esar digiuni da mesanote par poder fare la comunion. E i preti, i se lamentava ca ghe jera poca jente che fasea la comunion: par el pΓ¬ solo che done a mesa prima. Par forsa! Dopo le podea β€˜ndar casa a magnare! Cuei ca gavea da laorare da la matina a la sera, come gavariseli fato a esare dijuni da mesanote. I jera xΓ  slangorji parchΓ¨, da magnare, no xe ca ghin fusse stΓ  tanto. Eco ca le suore le gavea anca da spiegarghe ai toseti e ale tosete ca no se podea magnare prima de far la comunion. Come se no fusse xΓ  difisile insegnarghe che la particula la diventava el corpo e el sangue de GesΓΉ! I tri fradei da Montebelo e Gioanin, i se la contava, dopo β€˜ver finio de laorare par la E.P.T. (Electric Power Trasmission) tuta la jornata de cuΓ  e de lΓ  β€˜nte i posti β€˜ndove ca i li portava rento a la β€˜Steelwork’. Un dei tri fradei el gΓ  scomiziΓ  a contarghe a Gioanin ca i gavea cuasi finio de fare la strada nova. β€œCuale strada nova?” ghe gΓ  dimandΓ  Gioanin! β€œI gΓ  fato β€˜na strada nova de fianco al monumento: la vΓ  sΓΉ e la sboca β€˜nte la via Borgoleco, cuasi davanti a la casa β€˜ndove ca stava Belini. Te ricordito β€˜ndove ca ghe jera cuei dΓΉ portoni grandi, co le inferiΓ  cussΓ¬ alte? Da β€˜na parte te β€˜ndavi in corte da Belini, e da che l’altra te β€˜ndavi β€˜rento ala Vila. β€˜Desso i ga sverto tuto! On porton, co solo i pilastri, i lo ga portΓ  dove ca xe i giardineti vizin a la ciesa, e chel’altro, pilastri e inferiΓ , el xe stΓ  messo β€˜nsieme sol de drio de la vecia casa del fasio, dove ca β€˜deso xe paron Zonin. β€˜Ndove ca ghe jera el parco de la vila, ghe sarΓ  tute strade e tante case nove. El Comune el ga conprΓ  la tera dal Moro Fiasca e adeso el vendarΓ  la tera a tochi a cuei ca vol conprare par farse sΓΉ la casa”.
Dopo cuatro setimane, i tri fradei ga dovesto partire parchΓ¨ jera rivΓ  la nave ca portava el fero par far sΓΉ i tralici ca ghe ocoreva ala centrale eletrica. SΓΉ a Bayswater el governo el gavea dΓ  ordene de far sΓΉ β€˜na grande centrale eletrica a carbon, e bisognava pareciare tralici e pali par portar la corente dapartuto. Su a Bayswater ghe jera carbon ca no ocorea gnanca ondare soto tera par rincurarlo. I tirava via on mezo metro de tera dai canpi, e soto el jera tuto carbon! Ruspe grande fa case lo tirava su par inpienare camion β€˜ncora pΓ¬ grandi. Dopo, el carbon β€˜ndava sui β€œconveyor belt” e β€˜rento a la Centrale. LΓ  el saria stΓ  brusΓ  soto ale β€˜boilers’ par far vapore, e el vapore, soto presion, el gavaria fato girare le turbine ca fasea vigner fora la corente.
Sicome che i paesoti β€˜ntel out-back’ Australian, i stava ingrandendose, ghe saria ocoresta de pΓ¬ corente, cussi el governo el pareciava le robe par tenpo. Al s-ciapo de omini ca laorava in β€˜linea’, zerte volte ghe tocava anca de dormire β€˜nte le tende, come cuando ca i jera soldΓ . Ma i tri fradei da Montebelo, no i gavaria scanbiΓ  cuel laoro par gnente al mondo! I laorava co la scuadra dei geometri. Luri i gavea da β€˜ndar davanti de tuti, a trovar el posto dove ca saria stΓ  messi sΓΉ i tralici. In mezzo ai buschi e β€˜ndove ca ghe jera solo ca ofarme’ de piegore. In zerte parte, i metea xo solo formento dapartuto, ca no se podea vedare β€˜ndove ca scomiziava i canpi e β€˜ndove ca i finia. Ma i β€˜farmisti’, i savea xa ca arivava la E.P.T. a metar xo i tralici. I capi de la E.P.T., pena rivΓ  in Australia, i gavea fato conprare i camion mericani restΓ  indrio dopo finia la guera. Par i geometri e iΒ  so jutanti ghe gera le jeep.
Man man ca i β€˜ndava avanti, i geometri ghe disea β€˜ndove pareciare el trepie’ col strumento sora e dopo de β€˜ndare vanti on zento o dosento metri, zerte volte anca de pΓ¬, par misurare e livelare el posto par el tralicio. Ma el belo, el vignea dopo, pena finio de laorare! Fin ca i andava vanti e indrio coi trabicoli dei Geometri, luri i vedea β€˜ndove ca ghe jera cuatΓ  xo i canguri, i wallaby e, verso l’inbrunire, i coneji. E i sentia anca β€˜ndove ca svolava i osei. Osei de cussi tante cualitΓ , ca la jera na maraveja vedarli svolare e fermarse a magnare i fiori dei β€œbottle-brush” (fati come l’afareto ca neta le botije), e de le tante difarenti piante de β€˜caliptus’.
I gavaria vossudo ciapare on GalΓ  (Galah) anca luri, parchΓ¨ el jera on bel papagalo, deΒ  color griso-rosa, caβ€˜l inparava a parlare come on cristian. Ma lΓ , β€˜ntel β€˜bush’ Australian, ghe jera ogni ben de Dio. Par luri ca ghe piasea le bestie, la jera na cucagna! β€˜Ndove ca jera pΓ¬ fresco, ghe jera i koala, quei bei orseti ca magna le foie de caliptus. I gavaria podesto ciaparghene pΓ¬ de un, ma ghe saria dispiasesto farli patire. El GalΓ , parΓ², i lo volea, parchΓ¨ i gavea conosesto un β€œrigher” (montatore di fero), ca β€˜l vignea da Cogolo, e el ghi’n avea uno, ciapΓ  da picinin. El lo tegnea in gabia e β€˜l ghe gavea insegnΓ  a parlare e a tirar xo anca spropositi de parolaze.
Finio de laorare, se i gavea visto cualche bel s-ciapo de coneji, i tolea sΓΉ le s-ciope a dΓ² cane e anca el β€˜Winchester’, cuel s-ciopo da β€˜cow-boy’, e i β€˜ndava indrio par spararghe ai coneji. I coneji, in Australia, i xe come ca i fusse β€˜na piaga de l’Egito’, parchΓ©, i ghe ruina fora e i ghe magna fora tuto ai pori farmisti. E zerte volte gh’in jera cussΓ¬ tanti, ca no i doparava gnanca le s-ciope. Massa fazile!
Par cuelo i se gavea conprΓ  el Winchester! β€˜Na palotola in cana, on tiro par un, e veder chi ca copava el primo conejio! ParΓ² prima, co le s-ciope, i ghi’n avea xa ciapΓ  on paro de dozene da darghe al cogo da far da magnare el doman de sera. A spararghe ai coneji, podio imaginarve, i ghe fasea on gran piazere al β€œfarmista”, e sti fradei da Montebelo i zercava de far contenti tuti. I saria stΓ  pi contenti β€˜ncora, se el cogo ghe gavesse fato on poca de polenta da magnare col pocio del cone-jio, ma lΓΉ, el cogo, el disea ca nol catava farina zala da nisuna parte.Β Β» Linus DownUnder – Lino Timillero, Coniston 25-8-2015.

Foto:
1) Cartolina postale che mostra la Via Borgolecco di Montebello negli anni 70 del Novecento. Notare, oltre la curva, sulla destra, due dei 4 pilastri di cui Lino parla nel suo articolo, che erano posti all’ingresso di villa Sangiovanni; furono trasferiti poco tempo dopo nei giardinetti davanti alla Chiesa, dove si trovano tuttora. Sulla destra, seminascosta, la villa dei Conti Sangiovanni (in seguito detta villa Pasetti-Freschi-Sparavieri). Sulla sinistra le prime case popolari della ‘zona Gamba‘, dette ‘Case Fanfani‘, costruite in quello stesso periodo. (APUR – Archivio privato di Umberto Ravagnani).

Umberto Ravagnani

Se hai FACEBOOK e l’articolo ti ha soddisfatto metti MI PIACEΒ 
Oppure lascia un commento qui sotto…