BORGOLECCO STORY (4)

[253] BORGOLECCO STORY (4)

LINO TIMILLEROCONISTON – Nuovo Galles del Sud (AUSTRALIA)


Continua il racconto di Lino Timillero, dall’Australia, della sua vita a Montebello, quando abitava nella zona di via Borgolecco.
« Come che go zà dito, mi xe zincuanta dù (52) ani che sto in Australia. Se vojio savere calcossa de come che xe Montebelo desso, go da vardare el “google-map” sol computer! Senza secarghe le scatole a nissun! Se scrive: Montebello Vicentino, (metendo solo che Montebello, ghin vien su uno chel xe in California!), e vien fora la mapa de Montebello! E se pol nare pì grande: basta tocare i tasti: se pol parfin nare in giro par le strade come sa fusse lì che camino!!! E me son inacorto che, desso come desso, Via Borgolecco la riva fin zò ala Mira!! Na volta, co stavimo poco pì vanti dela pontareta che scomiziava ndove che ghe jera l Ostaria col zugo dele Boce, da de lì in zò, la jera ‘La Strada Fonda’. De Istà, co navimo da me zia Veronica ala sera, ghe corevo drio ale slusole par veder se jero bon a ciaparghene calche duna!!! Le svolava dapartuto!! Le slusole (lucciole)!!! Par nare dala strada ala casa, ghe jera come on marciapiè de sasi un tacà l altro, de colori nero e griso, mesi zò come cuei che ghe jera in Piassa, sol davanti del Municipio. E anca davanti ala Cesa! Se calche dun ghe pensasse: ndove jerili ndà catarli tuti cuei sasi grandi conpagni? I sasi vegnea catà su drento al Cianpo! Tuti conpagni e de colore conpagnà come che li volea chi che li conprava! A me ricordo che na volta don Francesco el gavea portà tuto el Coro de la Cesa in gita. Cantori grandi e picoli, co le mame e le spose, fin a ndove che jera nato San Luigi Gonzaga. Par tera, sol davanti del palazzoto ndove che stava la famejia Gonzaga, dapartuto ghe jera i sasi par tera!! Come cuei de la Piassa de Montebelo!! E coi bei disegni: parfin cole stele co zincue punte! Che belo che jera caminarghe sora!!
La casa ndove che semo ndà stare co ne ga tocà fare San Martin, la gavea na rete de fero che ghe fasea da confine. De là ghe jera i canpi dei du fradei Mericani. I vignea ciamà cussi parchè se savea che i jera stà in Merica a laorare. A uno dei fradrei i lo gavea soranominà Gimy. Desso tute case! E strade! E che bei nomi che le gà. Le strade: Via Benedetto Marcello e Vicolo Vivaldi!! Da chele parti lì ghe jera le slusole. Tante. De sera ghe corivimo drio!!! Me piasaria dimandarghe a Pierino Menti sel se ricorda anca lu dele slusole. Pierino el stava vizin a me zia Veronica, zò par la Strada Fonda. E navimo scola insieme. Fin dala prima clase. Co la Maestra Carlotto. So la casa de Via Borgolecco me mama ghe tocava pagare l afito. Me popà ghe ga tocà nar laorare in Svizara.
Cuando che me popà el laorava par la famejia dei Freschi-Sparavieri, stavimo nte la casa del guardian. Là no se pagava nisun afito! Vizin ala Cesa! Vizin ai Giardineti! Dopo on puchi de misi che stavimo in afito, la Catina la ga vossudo de pì schei par la luce. La corente la vignea dala so casa, delà dal muro. Ela la gavea el “Contatore” e la disea che doparavimo massa luce! Schei me mama no la ghin avea. Pudì maginarve… Me popà, se pol dire, nol jera ncora rivà in Svizara, come podevela me mama avere i schei par poder pagare depì par la luce? L afito dela casa se dovea pagarghelo a on vecio che tuti disea chel jera pien de schei. Ma la luce bisognava pagarghela ala Catina. Ela la gavea el “Contatore”. La Catina ne ga tajà i fili dela corente! Chela sera jera tuto scuro! Me mama la ga tirà fora na candela e ghemo magnà con chel poco de luce che fasea la candela. Me mama la ga catà on “Canfin”. No so ndove! El jera bastanza grandeto. Se podea vederghe ben par magnare. El jera tacà so na trave sora la tola. De sora ghe jera el stanzon ndove ca dormivimo nialtri cuatro fradei. La scala par nar su la jera drio al muro. Me mama la gavea vudo siè mas-ci. Jerimo restà in cuatro parchè Vittorio, el pì vecio, el se gavea sposà e el gavea zà on fiolo. El cuarto fiolo de me mama el jera morto dal “Tetano” col gavea nove ani. A me ricordo ncora desso: cuando che me mama finia de dire el tarzeto, cuasi tute le sere, la disea senpre: ”… e ti, caro Adelino, prega par nialtri e par to popà chel xe in Svizara a laorare par tuti”. Par me mama, de sicuro, me fradelo Adelino el jera in Paradiso, e, almanco lu, el gavaria podesto jiutarne.
Semo na vanti col “Canfin” par dei ani. Me ricordo che, zerte volte, so ndà anca mi a tore na botijieta de petrolio da Panpurio. E dirghe che saria passa me mama par pagare! De fianco dela casa, ntra el muro e la rete del confine, ghe jera el punaro e on poche de galine. Pì vanti ghe jera el cesso. De drio ala casa ghe jera el staloto pal mas-cio. A me mama ghe tocava far da magnare sol fogolare. El jera fato de tochi de piera nera. Bastanza grandeto e pien de zenere dapartuto. La cadena par tacar su el caldiero par fare la polenta la jera tuta nera e piena de caluzine. E là se tacava anca la pegnata par far bujire l aqua da cusinare i spaghetti che jera stà fati col torcio. E me vien inamente ncora el gusto e l odore del salado brustolà sora le bronze del fogolare… E come che la jera bona la polenta, brustolà so la gradela sora le bronze del fogolare! La stua conomica, gnanca insognarsela! Xe passà tri ani prima che me popà, dala Svizara, el gavesse mandà bastanza schei par portarla casa e dopo pagarla a rate! Ma me mama la savea ben come starghe drio al fogolare. Par fare la lissia la scaldava l aqua nte on pegnaton e la lavava tute le robe de la casa drento al mastelo e co l asse da lavare. La ciapava l aqua, che vignea zò par la gorna del cuerto dela casa e la nava drento a na mastela.
Co jero pì grandeto, navo anca mi a tore l aqua col bigolo e du seci. El rubineto del aqua el jera poco pì vanti dela pontareta, tacà a on toco de piera. E me mama la metea i seci sora el seciaro. Sol fogolare me mama la fasea tuto cuel che ghe ocoreva par far da magnare. La gavea na farsora
(padella) e con cuela la fasea le torte e la fasea le patate arosto, e tute le robe che ghe ocoreva, E jera tuto bon!!! Co rivava l Inverno e ghe jera on fredo da can, sol fogolare ghe jera tante bronze da metare nte le fogare e rento al leto so le moneghe, par scaldarse co se nava a dormire! Par tuto el tempo che me popà se stà in Svizara, mi dormivo co me mama. Sol davanti dela casa ghe jera na stanzeta e se podea nar drento dala cusina. La gavea na finestrela che se vedeva l orto e la strada. Me popà el vignea casa na volta al ano, co rivava Nadale. Du tochetini de cicolata par mi e me fradelo Albano. Prima che rivasse l Epifania el jera zà ndà via.» (continua) (Linus DownUnder – Lino Timillero, Coniston 18-2-2019)

Foto: Montebello, Ponte Novo: «… I sasi vegnea catà su drento al Cianpo! Tuti conpagni e de colore conpagnà come che li volea chi che li conprava! » (Umberto Ravagnani – 2009).

Umberto Ravagnani

Se hai FACEBOOK e l’articolo ti ha soddisfatto metti MI PIACE 
Oppure lascia un commento qui sotto…

QUANDO BASTAVA UN ‘CANFIN’

[138] QUANDO BASTAVA UN ‘CANFIN’ PER RISCHIARARE LE NOTTI DEI NOSTRI AVI – Di LINO TIMILLERO– Coniston (AUSTRALIA)

« Cari amici de Montebelo, go da dirve la verità, mi a son de na età de cuando ca ghe volea ‘ncora el canfin par far ciaro de note, parché la corente no la ghe jera dapartuto come ca xe desso. E me tocava a mi, el pì picinin, a ‘ndar tore na butijeta de petrolio, na volta ogni tanto, prima chel fusse finio. E, zerte volte, me tocava dirghe a Panpurio de scrivare sol libro ca saria vegnesta me mama a pagare. Dopo finia la guera, ‘ntel ’47, ne gavea tocà de far San Martin, canbiar de casa e ‘ndare in afito! E a me popa’ el gavea dovesto ‘ndare in Svissara, parché a Montebelo no ghe jera laoro da nissuna parte. El canfin! Al dì de oncò, ghin sarà puchi ca se recordarà cossa cal jera el canfin… In casa, ghe saria sta la corente, ma i fili i vignea da la parte de là, da ‘ndove che la parona de casa nostra la gavea el “Contatore”. La Catina la disea ca consumavimo massa luce e, sicome che ela la jera la parona, e me mama la ghe pagava l’afito, la Catina la volea de pì schei de afito! Ma schei me mama no la ghin’avea! Pudì maginarve. Me popà, se pol dire, nol jera ‘ncora rivà in Svissara, come podevela me mama aver i schei par poder pagare de pì de afito? Alora la Catina la ga tajà i fili dela luce! A la sera jera tuto scuro! Me mama, da calche parte, la ga catà on canfin bastanza grandeto. Se podea vederghe ben par magnare parché el jera tacà so na trave sora la tola ‘ndove ca se magnava. De sora ghe jera el stanzon ‘ndove ca dormivimo nialtri cuatro fradei. Me mama la gavea vudo sie mas-ci, ma jerimo restà in cuatro parché uno el jera xa sposà e el gavea xa on fiolo, e uno el jera morto dal tetano col gavea nove ani. A me ricordo ‘ncora desso: cuando ca me mama la finia de dire el tarzeto, cuasi tute le sere, la disea senpre: “… e ti caro Angelino, prega par nialtri e par to popà cal xe la in Svissara a laorar par tuti”. Par me mama, de sicuro, me fradelo Angelino el jera in Paradiso, e, almanco lu, el gavaria podesto jutarne. No sto a dirve come ca se fato el canfin, ma ca bisognava star tanto tenti cuando ca se dovea metare el petrolio, o canbiarghe la stopa. Ca nol cascase par tera, par carità! El canfin ‘ndava in zento tochetini e no ghe saria sta pì luce par on bel toco, solo candele! Co jerimo in afito dala Catina, me mama ghe tocava far da magnare sol fogolare. El jera fato de tochi de piera nera, bastanza grandeto e pien de zenere dapartuto. La cadena par tacar su el caldiero par fare la polenta, la jera tuta nera e piena de caluzine. Bisognava star tenti che le pegnate gavesse su el cuercio, se no el caluzine el saria cascà rento sol magnare. Ma me vien ‘ncora a mente el gusto e l’odore del salado brustolà sora le bronze del fogolare… E come ca la jera bona la polenta, brustolà so la gradela sora le bronze del fogolare. La stua conomica, gnanca insognarsela! Xe passà tri ani prima ca me popà, dala Svissara, el gavesse mandà casa bastanza schei par portarla casa e dopo pagarla a rate! Ma me mama la savea ben come starghe drio al fogolare. Par fare la lissia, la scaldava l’acua ‘nte on pegnaton e la lavava tute le robe de la casa rento al mastelo e co l’asse da lavare. Sol fogolare la fasea tuto cuel ca ghe volea par far da magnare. La gavea na farsora e con cuela la fasea le torte e la fasea le patate arosto e tute le robe ca ghe ocoreva. E jera tuto bon. Co rivava l’inverno, e el fasea on fredo da can, sol fogolare ghe jera tante bronze da metare ‘nte le fogare e rento al leto so le moneghe, par scaldarse co se ‘ndava a dormire. Cuei jera i ani co se ‘ndava oncora a filò. Nialtri ‘ndavimo in stala da Plinio. Se stava calditi parché ghe jera in stala pì de dò dozene de bestie tra vache e vedei. Le done prima le disea el tarzeto, dopo le disea le ‘tanie e, finio le jaculatorie, le podea metarse a fare le so robe: chi fasea gusto calziti o majoni de lana coi feri, chi taconava le braghe rote e altre robe, ciacolando e contandosela. ‘Na sera a la setimana, parò, tuti dovea scaolare le panocie par Plinio, el paron de la stala, parché lu el disea ca el canfin el gavea bisogno de petrolio, e le ciacole no gavea mai fato ciaro de note! Scaolavo anca mi, ma de scondon me metevo na man so la sbezola, e con che l’altra man me metevo in boca on par de grani de sorgo ala volta, e i rosegavo pian pianelo. Ma gaveo da star tento ca no me vedesse nissun parché, se el paron se inacorzeva, el gavaria scomizià a dire ca la jente la vignea a filò par magnarghe el sorgo, e ca se tuti gavesse fato cussi el saria restà sensa sorgo e tute ‘ste robe. E tuti savea ca Plinio el jera on omo de Ciesa. Par cuelo ca le done le disea su el tarzeto, parché el se ricordase ca’l jera de Ciesa. A calche d’un ca ghe dimandava, el ghe assava metare on poche de piantine de verze, a metà par un, so la so tera. Se uno metea xo 60 verze, le jera 30 par lu e 30 par Plinio. I so canpi i jera vizin al cimitero. Ghe jera on fosso senpre pien de acua. Calche d’un gavea ficca xo on tubo sol fosso, e vignea fora acua e no la se fermava mai. Co jera la so stajon, me tocava a mi, toseto, a ‘ndare a bevarare le nostre verze. Tuti i dì, pena ‘nda’ xo el sole, col caldo de agosto, ‘ndavo de corsa fin al canpo de le verze. Corevo su e xo dal fosso col secio pieno a metarghe on pegnatin de acua par piantina, e dopo, senpre de corsa, indrio a l’oratorio a finire de zugare la partia de calcio. Co jero diventà bastanza grande da ‘ndare co la bicicleta da dona de me mama, ‘ndavo fin a Zarmeghedo par tor su le piantine de verza che me mama gavea xa dimandà. Me tocava fare tuta la pontara de la ciesa, e su ‘ncora, passà el cimitero, e’ncora pì su, fin ala corte dei Bertola, e senpre parando su la bicicleta a piè parché la pontara la jera massa dura. Ma la jera na belessa a vegnere indrio! Le piantine de verza rento la sporta tacà sol manubrio, e xo in disesa, a tuta bira ca me parea de ‘ndare a zento al’ora. Rivavo casa come on lanpo, par traverso: Belocaria, Perosa, e xo pal Vigazolo, pasavo davanti al municipio, vanti ‘ncora on poco e jero casa. Co ‘ndava xo el sole, me catavo co me mama sol canpo de Plinio a metar xo tute le piantine de verze. Me mama fasea el buseto so la tera, la metea xo la verzeta e la sarava la tera torno e mi jero li pronto, col secio e el pegnatin a bevarare la piantina par la prima volta. Cussi’ inparavo ‘ndove ca jera xo le nostre verze, e dopo, no me gavaria sbaljià a bevararle, cuelo xe poco ma sicuro! » (Lino Timillero – Vicentini nel mondo – Marzo 2017).

Umberto Ravagnani

Foto: Una cucina degli anni 50 del Novecento (APUR – Umberto Ravagnani 2007).

AI LETTORI:
Quanti volessero collaborare per la redazione del notiziario con articoli o segnalare argomenti di particolare interesse, notizie, curiosità, proverbi locali, foto, cartoline d’epoca, etc., sono invitati a mettersi in contatto con l’Associazione.

Se hai FACEBOOK e l’articolo ti ha soddisfatto metti MI PIACE 
Oppure lascia un commento qui sotto…