CARO GESU BAMBINO

[161] CARO GESΓ™ BAMBINO

Di LINO TIMILLERO – Coniston (AUSTRALIA)

Un click qui per ingrandire l'immagine

Β« CuΓ  in Australia, l’Epifania no la xe β€˜Festa de Preceto’. PerΓ², a mi, me xe vegnΓΉ a mente come ca jera le robe cuando ca jero on toseto, e spetavo senpre de vedare cossa ca me gavaria portΓ  la Befana! Zugatoli, de sicuro, gnanca uno! Me popΓ  el jera in Svissara, e el primo ano ch’el jera lΓ , a Nadale, nol jera gnanca vegnΓΉ casa! Drento sol scalzaroto, tacΓ  sora al fogolare, catavo on paro de mandarini, siΓ¨ sete carobole, e on poche de stracaganasse. Dopo β€˜ver spelΓ  i mandarini, e dopo β€˜verli magnΓ , magnavo anca le scorze. SΓ¬, le scorze dei mandarini! Ma jero contento istesso!!! Zugavo co chialtri tusiti ca vignea a l’Asilo insieme, e luri i gavea sΓ¬ i zugatoli: machinete, trenini, e parfin le pistole par zugare a Indiani e Cao-Boi!!!
β€˜Na volta, jero drio zugare co Zorzeto. El gavea Tre machinete, e jerimo drio zugare drento in te la cusina de casa sua, sora la tola da magnare. Se vede ca fasivimo massa bacan, cussΓ¬ so mama la ne ga disesto de β€˜nar fora!
Nialtri dΓΉ, vhrum – vhrum, no ghemo dito gnente. Fora jera fredo, ma zugando, chi sentia fredo? Mi perΓ², ghe go dito a Zorzeto de tor sΓΉ on vaseto de vero sagomΓ  bislungo e de color verde. LΓΉ el me dimanda parchΓ¨, e mi ghe digo: β€œTe vedarè”! Fora, vizin a la strada, ghe jera on mureto chel gavea par sora dele piere una tacΓ  l’altra, ca a nialtri dΓΉ el ne someiava on stradon β€˜sfaltΓ , fato aposta par far le Mile –Milia! Zorzeto el me dise: β€œLino, sa ghin femo del vaseto de vero?”. Mi ghe digo: β€œGheto mai visto na Coriera zugatolo?” Lu el me dise: β€œMi no, e ti?” β€œVarda, la femo suito.” GΓ² ciapΓ  le tre machinete sue, le go messe in fila una drio che l’altra, dopo gΓ² ciapΓ  l’afareto bislungo fato de vero. Ghe lo gΓ² messo sora le tre machinete, e xe vegnΓΉ fora la Coriera! Zorzeto el me gΓ  vardΓ  a boca verta, e dopo el me gΓ  dito: β€œPrima tì”! Saria stΓ  come chel gavesse dito: β€œLe machinete xe mie, ma la β€œCoriera” la xe prima par tΓ¬. β€œVhrum-vhrum”, e chi sentia fredo!
Zorzeto el gavea anca on can. El se ciamava Reno! El gavea le ganbe curte, e col corea sbajandote drio, te podevi nare fin in piassa, prima chel te ciapasse! ParΓ², el jera on can bon! Co gavivimo le broze sui zanoci, o sui gunbi dei brazi, navimo vizin a lΓΉ, Reno, e lΓΉ el ne dava on par de lecΓ  so le broze, e jerimo sicuri ca gavarissimo guario suito. L’inverno de l’ano prima, co jerimo a l’Asilo, on dΓ¬ gavea scominziΓ  a nevegare. Da la matina fin ca xe stΓ  ora de nar casa, semo stΓ  drento β€˜ntel Cameron ndove ca se magnava. Suor Albina la jera drio diventar mata!!! La volea ca stissimo fermi e no la volea sentirne zigare! PΓ¬ che la disea de star chieti, e pΓ¬ ca nialtri sbraitavimo!!! Co xe stΓ  ora de nar casa, Suor Albina la jera so la porta. La fasea nar fora i tusiti e le tosete drio man ca la vedea calche dun ca vignea a turli. A mi cuela volta, xe vegnΓΉ torme me popΓ ! El gavea sΓΉ el tabaro parchΓ© el jera drio nevegare bastansa forte. El me ga ciapΓ  par man, alsando el tabaro da la man zanca, el me gΓ  messo tacΓ  a la so ganba. El me gΓ  cuerto col tabaro, e, senpre tegnendome par man, el me gΓ  dito: β€œTiente tacΓ  a la me man e camineme drio.” Lu el fasea on paso e mi me tocava farghene dΓΉ, zerte volte tri, de pasi! Jera tuto scuro, soto al tabaro. Podevo vedare i me piΓ©, co le sgalmere, e i piΓ© de me popΓ , ma lΓΉ el gavea i scarpuni co le broche sui tachi e anca so le sole. La neve la jera xa tanta ma me popΓ  el caminava ndove ca i spazini del comune i gavea xa netΓ  el marciapiΓ¨ col trajon piccolo tirΓ  a man. Par netar la strada, se dovea doparare on trajon pΓ¬ grando, e bisognava chel fusse tirΓ  da on tratore.
Cuando ca rivava la penultima domenega de Avento, el capelan, don Francesco, el ne disea a nialtri tusiti ca jera ora de scomiziare a catar sΓΉ el mus-cio par fare el Presepio. Alora se metivimo dacordo, in du tri ca β€˜ndavimo a scola insieme, e se caminava fin sui taraji del Cianpo. Da la parte de drento, β€˜ndove ca che jera el muro parchΓ¨ co vignea xo tanta acua, no la portasse via el tarajo, lΓ  ghe jera tanto mus-cio! Inpienavimo on paro de zestei, e li portavimo in Ciesa, de fianco a l’altare dela S.Deposizione. El Presepio el vignea fato lΓ  ogni ano e ghe volea tanto mus-cio parchΓ© el jera on Presepio bastansa grandeto, no robete come i presepi de Zarmeghedo o de Montorso. La matina de l’Epifania, ghe jera i Re Magi, come ogni ano. Co jera finia la Messa, e el Prete el gavea dito: β€˜Ite Missa est”, nialtri tusiti β€˜ndavimo tuti a vedere el Presepio! Fofo, el sacrestan, el gavea messo sol Presepio i Re Magi co scomiziava la Messa prima. Un dei Re Magi, el jera `ncora sentΓ  sol sΓ² camelo! Al Bambino GesΓΉ, i ghe portava: Oro, Incenso e Mirra!
Cuando ca mi jero xa in Australia da on puchi de ani, xe vignesta fora na bela canson rivΓ  fresca dal’Italia, cantΓ  dai tusiti, e me ricordo on poche de parole β€˜ncora desso:

Caro GesΓΉ Bambino, tu che sei tanto buono,
Lascia una volta il cielo
E vieni a giocare, a giocare con me.
Tu sai che il babbo Γ¨ povero ed io non ho giocattoli…

Co la gΓ² sentia la prima volta, me so sconto da na parte e me gΓ² messo a pianzere Β».
(Lino Timillero – Coniston 10-1-2016).

Umberto Ravagnani

Foto:Β Una delle moltissime rappresentazioni della nascita di GesΓΉ nelle case di Montebello (APUR – Umberto Ravagnani).

 

La redazione del notiziarioΒ  AUREOS – AMICI DI MONTEBELLOΒ  augura a tutti i lettori un

FELICE NATALE e un PROSPERO 2020

Β 

Se hai FACEBOOK e l’articolo ti ha soddisfatto metti MI PIACEΒ 
Oppure lascia un commento qui sotto…

Β