[188] LINO TIMILLERO RACCONTA
Di LINO TIMILLERO – Coniston (AUSTRALIA)
LINO TIMILLERO, nostro compaesano emigrato in Australia nel 1967, ci ha inviato questo interessante articolo sui Circoli e le Associazioni di Italiani in Australia e nel mondo:
« El mese de Agosto de st’Inverno passà, gaveo cuasi finio de vangare l’orto par pareciare da metar xo on poco de luame. La matina jero ‘ndà da ‘Bunning’ a conprare cuei sachi de ‘Fertiliser’ xa prunti: on poco de vaca, de piegora e anca de schiti de galina. Gò scominzià a smissiare tuto co la tera… e gà tacà a piovare! Vardè ca no me son mija sbaljà! Cuà in Australia, el mese de Agosto, el xe come cal fusse Febraro, in tuta l’Europa, l’America e conpagnia bela! Jera cuasi le do. Me mojere la me ciama e la me dise de narghe a inpostare na letara. La casseta de la Posta la xe lì a dù passi. Me togo sù l’onbrela, verzo el ‘tilt-a-door’ del garage, e vago sù sola pontareta par metare la letara ‘nte la casseta de la Posta: cuà le xe tute piturà de Rosso.
On poco pì vanti, finisse la pontara, e se pol vedare el mare. Vago sù, tanto par vedare come cal jera el tenpo. No se podea gnanca vedare el mare, cal xe lì, poco distante. Nuvole e Oceano, i jera tuta na confusion! E vignea xo na pioveta ca la disea: xe inverno, e te fasso vedar mi cuanto ca tiro vanti! Ma cuà a Wollongong, semo fortunà parche no jazza mai!!! Da nialtri, el Meteo, el xe comandà dal Polo Sud. L’Antartico, el xe on poco pì soto de la Tasmania, e dal Polo in sù, no ghe xe gnente in mezo! Xe cuando ca riva el Nigno o la Nigna, ca le robe le se mete a ‘ndare par traverso. Co ghe xe el primo el xe massa suto, e no piove par setimane; co se soto la seconda, la Nigna, lora el piove anca on fià massa! L’Oceano del South Pacific, el va da l’Australia al Cile e in mezo no ghe xe gnente.
Sicome ca el piovea, so ‘ndà soto casa a farme na docia in pressia. Me go vestio e so ‘ndà sù in casa par darghe na ocià al ‘Giornale di Vicenza’ so l’Internet. Vardà cuelo, me taco so l’Ente ‘Vicentini nel Mondo’, parchè me jera vegnù in mente de vardare cuante ‘Associazioni’ e ‘Circoli’ ghe xe in giro pal mondo! Savio cuante? 42!!! Cuarantadò!!! Tante!!!
Tirando via le dò ca xe in Italia, la pì parte, le xe so l’Emisfero Meridionale. Ciò!!! Ondese in Brasile!!! Sete in Australia!!! Do in Argentina! Una in Venezuela, una in Uruguai e una in Sud Africa! Se vulì, provè a vardare anca vialtri!!! Me go meravejià ca du ‘Circoli’ brasiliani e un argentin, i gà el ‘site’ so l’Internet, ca spiega tuto cuel ca i farà in tei dodese misi de l’ano. A parte el fato ca nialtri disemo Argentina e luri, i Argentini, i dise Arghentina parchè i parla ‘Castigliano’, xe da dirghe: Bravi!!! El ‘Circolo’ de Buenos Aires el gà parfin on ‘Gruppo Teatrale’ de nome “Luigi Meneghello”! E ghe xe anca el ‘Circolo’ de Cordoba in Arghentina!
El xe pì sù, verso le Ande, distante da la Capitale, ma come ca dise luri, nel Centro Geografico de l’Arghentina!!!
De preciso, no sò cuanto ca sia distante Cordoba da Buenos Aires, ma vardando la cartina, me par cal sia come da Sydney a Melbourne. Cuasi 800 (otozento) km. E son vegnù a savere ca dù fradei da Cordoba, i gà zugà el calcio co la scuadra de la U.S. Montebello, la scuadra de calcio del me paese! A cuei tenpi, jera Presidente de la U.S. Montebello el Sior Gioanin, un dei tri fradei da Montebelo ca mi ve gò contà on poca de la so storia.
Vedio, la saria na gran bela roba se calche d’un de Buenos Aires,o de Cordoba, o anca de Montevideo, i ne contasse cossa ca ghe xe e come ca la và da chele parte là!
Cuà in Australia, mi gò vudo la fortuna da essar stà a trovar tuti i ‘Circoli’! O par na storia o par naltra, so ‘ndà fin a Adelaide, el ‘Circolo’ pì distante da Wollongong. Forse, ‘ndando vanti col tempo, saltarà fora on ‘Circolo’ anca a Perth, in Western Australia, e, magari, un a Hobart, in Tasmania. Se el bon Dio el volarà, saremo ‘ncora cuà! Ma sarà tanto difizile parchè anca nialtri ‘Vicentini’, ca se vojia o no se vojia, semo drio diventar veci, e co se diventa veci, no se xe pì boni de far cuel ca se fasea da xovani! E se i xovani no i se fa vanti, finirà anca calche ‘Circolo’. Ma no stemo lì a parlar de brute robe. Tiraremo vanti come ca se podarà, e la Madona de Monte Berico, speremo ca la ne jiuta, ma Tanto!!!
Ve digo la santa verità, par mi, Myrtleford, el primo ‘Circolo’ fondà in Australia, el xe cuelo ca me piase de pì de tuti! El paese el xe in Victoria, de là del confine col New South Wales e ‘vanti on zentenaro de km., e fora via de la Freeway ca va a Melbourne. In giro ghe xe tanti monti e on bel fiume cal se fà cativo col piove tanto! Là se cata ‘ncora i magnari come ca i fasea na volta! Ghe xe Vicentini ca i xe là da tanti ani. Fameie ca jera rivà là dal ’20 e dal ’30. Tradision mantegnù vive da ‘lora, par generasion ca gà inparà a caminare e a parlar dialeto, tuto insieme, e a rispetare tuti e tuto! E sicome ca i jera tanti, i se fa rivare da l’Italia parfin la Prugna, chel bon licuore ca me mama me mandava a conprare da Zonin, co jero toseto. Par no parlare de le soprese e dei saladi! I fa su el mas-cio come cal fasea su i saladi el mazin ca vignea a far su el mas-cio a casa nostra depì de sesanta ani fa! Cuando ca go sajià na mortadela fata là, so restà a boca verta: come cala fusse sta fata su la setimana prima a casa de me mama! E co se và in giro par Myrtleford, ghe xe el giarin de fianco de le strade, come a Montebelo o a Villaverla. Vialtri ‘desso dirì: “Parchè Villaverla?”. El signor Revrenna, Presidente dei “Vicentini’ de Myrtleford par tanti ani, el xe nato a Villaverla! E a Cordoba? Come se le le robe de na volta a Cordoba? E a Buenos Aires? E a Montevideo?
‘Desso ca ghe xe el Papa Italo-Arghentino, parchè calche dun no ne conta come ca và le robe da vialtri in Sud America, in Sud Africa e anca da le altre parte, ‘ndove ca ghe xe “Vicentini”.
Sol nostro caro Periodico, vien messe su le novità dei Circoli come ca le ghe vien riportà a luri, ma nialtri in giro pal mondo, no savemo mia cossa ca ghe xe tra Cordoba e Buenos Aires.
A Myrtleford, na volta i laorava tanto sol tabaco. ‘Desso cuelo el xe cuasi finio e i se ga messi a tirar su visele, castagnare, nogare e parfin chela roba ca i dopara par fare la Bira!
A Wollongong, la ‘Steelwork’ desso la gà gnanca metà de tuti omini ca i gavea na volta. Le Inprese taliane le xe diventà australiane o le se stà vendù! Port Kembla la xe drio riprenderse desso, dopo ca tante Industrie ca fasea anca porcarie tra fumi e “licuami” ghe gà tocà de sarar su e spetare de essar licuidà e anca pezo!
Ma se tira vanti. ‘Desso, da veci, ma senpre zercando de star su col morbin!!!
(Linus DownUnder – Lino Timillero Coniston 15-10-2015) »
Umberto Ravagnani
Foto: Lino Timillero a Montebello il 19 settembre 2019 mentre ci racconta della sua esperienza in Australia. A destra Ferruccio Zecchin attuale Presidente di “Vicentini nel Mondo“. In secondo piano Maria Grazia Maggio Presidente degli “Amici di Montebello” (Foto Adelino Fioraso).
Se hai FACEBOOK e l’articolo ti ha soddisfatto metti MI PIACE 
Oppure lascia un commento qui sotto…