BORGOLECCO STORY (4)

[253] BORGOLECCO STORY (4)

LINO TIMILLEROCONISTON – Nuovo Galles del Sud (AUSTRALIA)


Continua il racconto di Lino Timillero, dall’Australia, della sua vita a Montebello, quando abitava nella zona di via Borgolecco.
Β« Come che go zΓ  dito, mi xe zincuanta dΓΉ (52) ani che sto in Australia. Se vojio savere calcossa de come che xe Montebelo desso, go da vardare el β€œgoogle-map” sol computer! Senza secarghe le scatole a nissun! Se scrive: Montebello Vicentino, (metendo solo che Montebello, ghin vien su uno chel xe in California!), e vien fora la mapa de Montebello! E se pol nare pΓ¬ grande: basta tocare i tasti: se pol parfin nare in giro par le strade come sa fusse lΓ¬ che camino!!! E me son inacorto che, desso come desso, Via Borgolecco la riva fin zΓ² ala Mira!! Na volta, co stavimo poco pΓ¬ vanti dela pontareta che scomiziava ndove che ghe jera l Ostaria col zugo dele Boce, da de lΓ¬ in zΓ², la jera β€˜La Strada Fonda’. De IstΓ , co navimo da me zia Veronica ala sera, ghe corevo drio ale slusole par veder se jero bon a ciaparghene calche duna!!! Le svolava dapartuto!! Le slusole (lucciole)!!! Par nare dala strada ala casa, ghe jera come on marciapiΓ¨ de sasi un tacΓ  l altro, de colori nero e griso, mesi zΓ² come cuei che ghe jera in Piassa, sol davanti del Municipio. E anca davanti ala Cesa! Se calche dun ghe pensasse: ndove jerili ndΓ  catarli tuti cuei sasi grandi conpagni? I sasi vegnea catΓ  su drento al Cianpo! Tuti conpagni e de colore conpagnΓ  come che li volea chi che li conprava! A me ricordo che na volta don Francesco el gavea portΓ  tuto el Coro de la Cesa in gita. Cantori grandi e picoli, co le mame e le spose, fin a ndove che jera nato San Luigi Gonzaga. Par tera, sol davanti del palazzoto ndove che stava la famejia Gonzaga, dapartuto ghe jera i sasi par tera!! Come cuei de la Piassa de Montebelo!! E coi bei disegni: parfin cole stele co zincue punte! Che belo che jera caminarghe sora!!
La casa ndove che semo ndà stare co ne ga tocà fare San Martin, la gavea na rete de fero che ghe fasea da confine. De là ghe jera i canpi dei du fradei Mericani. I vignea ciamà cussi parchè se savea che i jera stà in Merica a laorare. A uno dei fradrei i lo gavea soranominà Gimy. Desso tute case! E strade! E che bei nomi che le gà. Le strade: Via Benedetto Marcello e Vicolo Vivaldi!! Da chele parti lì ghe jera le slusole. Tante. De sera ghe corivimo drio!!! Me piasaria dimandarghe a Pierino Menti sel se ricorda anca lu dele slusole. Pierino el stava vizin a me zia Veronica, zò par la Strada Fonda. E navimo scola insieme. Fin dala prima clase. Co la Maestra Carlotto. So la casa de Via Borgolecco me mama ghe tocava pagare l afito. Me popà ghe ga tocà nar laorare in Svizara.
Cuando che me popΓ  el laorava par la famejia dei Freschi-Sparavieri, stavimo nte la casa del guardian. LΓ  no se pagava nisun afito! Vizin ala Cesa! Vizin ai Giardineti! Dopo on puchi de misi che stavimo in afito, la Catina la ga vossudo de pΓ¬ schei par la luce. La corente la vignea dala so casa, delΓ  dal muro. Ela la gavea el β€œContatore” e la disea che doparavimo massa luce! Schei me mama no la ghin avea. PudΓ¬ maginarve… Me popΓ , se pol dire, nol jera ncora rivΓ  in Svizara, come podevela me mama avere i schei par poder pagare depΓ¬ par la luce? L afito dela casa se dovea pagarghelo a on vecio che tuti disea chel jera pien de schei. Ma la luce bisognava pagarghela ala Catina. Ela la gavea el β€œContatore”. La Catina ne ga tajΓ  i fili dela corente! Chela sera jera tuto scuro! Me mama la ga tirΓ  fora na candela e ghemo magnΓ  con chel poco de luce che fasea la candela. Me mama la ga catΓ  on β€œCanfin”. No so ndove! El jera bastanza grandeto. Se podea vederghe ben par magnare. El jera tacΓ  so na trave sora la tola. De sora ghe jera el stanzon ndove ca dormivimo nialtri cuatro fradei. La scala par nar su la jera drio al muro. Me mama la gavea vudo siΓ¨ mas-ci. Jerimo restΓ  in cuatro parchΓ¨ Vittorio, el pΓ¬ vecio, el se gavea sposΓ  e el gavea zΓ  on fiolo. El cuarto fiolo de me mama el jera morto dal β€œTetano” col gavea nove ani. A me ricordo ncora desso: cuando che me mama finia de dire el tarzeto, cuasi tute le sere, la disea senpre: ”… e ti, caro Adelino, prega par nialtri e par to popΓ  chel xe in Svizara a laorare par tuti”. Par me mama, de sicuro, me fradelo Adelino el jera in Paradiso, e, almanco lu, el gavaria podesto jiutarne.
Semo na vanti col β€œCanfin” par dei ani. Me ricordo che, zerte volte, so ndΓ  anca mi a tore na botijieta de petrolio da Panpurio. E dirghe che saria passa me mama par pagare! De fianco dela casa, ntra el muro e la rete del confine, ghe jera el punaro e on poche de galine. PΓ¬ vanti ghe jera el cesso. De drio ala casa ghe jera el staloto pal mas-cio. A me mama ghe tocava far da magnare sol fogolare. El jera fato de tochi de piera nera. Bastanza grandeto e pien de zenere dapartuto. La cadena par tacar su el caldiero par fare la polenta la jera tuta nera e piena de caluzine. E lΓ  se tacava anca la pegnata par far bujire l aqua da cusinare i spaghetti che jera stΓ  fati col torcio. E me vien inamente ncora el gusto e l odore del salado brustolΓ  sora le bronze del fogolare… E come che la jera bona la polenta, brustolΓ  so la gradela sora le bronze del fogolare! La stua conomica, gnanca insognarsela! Xe passΓ  tri ani prima che me popΓ , dala Svizara, el gavesse mandΓ  bastanza schei par portarla casa e dopo pagarla a rate! Ma me mama la savea ben come starghe drio al fogolare. Par fare la lissia la scaldava l aqua nte on pegnaton e la lavava tute le robe de la casa drento al mastelo e co l asse da lavare. La ciapava l aqua, che vignea zΓ² par la gorna del cuerto dela casa e la nava drento a na mastela.
Co jero pì grandeto, navo anca mi a tore l aqua col bigolo e du seci. El rubineto del aqua el jera poco pì vanti dela pontareta, tacà a on toco de piera. E me mama la metea i seci sora el seciaro. Sol fogolare me mama la fasea tuto cuel che ghe ocoreva par far da magnare. La gavea na farsora
(padella) e con cuela la fasea le torte e la fasea le patate arosto, e tute le robe che ghe ocoreva, E jera tuto bon!!! Co rivava l Inverno e ghe jera on fredo da can, sol fogolare ghe jera tante bronze da metare nte le fogare e rento al leto so le moneghe, par scaldarse co se nava a dormire! Par tuto el tempo che me popΓ  se stΓ  in Svizara, mi dormivo co me mama. Sol davanti dela casa ghe jera na stanzeta e se podea nar drento dala cusina. La gavea na finestrela che se vedeva l orto e la strada. Me popΓ  el vignea casa na volta al ano, co rivava Nadale. Du tochetini de cicolata par mi e me fradelo Albano. Prima che rivasse l Epifania el jera zΓ  ndΓ  via.Β» (continua) (Linus DownUnder – Lino Timillero, Coniston 18-2-2019)

Foto: Montebello, Ponte Novo: Β«… I sasi vegnea catΓ  su drento al Cianpo! Tuti conpagni e de colore conpagnΓ  come che li volea chi che li conprava! Β» (Umberto Ravagnani – 2009).

Umberto Ravagnani

Se hai FACEBOOK e l’articolo ti ha soddisfatto metti MI PIACEΒ 
Oppure lascia un commento qui sotto…

Lascia un commento

Il tuo indirizzo email non sarΓ  pubblicato. I campi obbligatori sono contrassegnati *