EL CORO SORA L’ALTARE

[227] EL CORO SORA L’ALTARE MAGGIORE

LINO TIMILLEROCONISTON – Nuovo Galles del Sud (AUSTRALIA)


Continua con un altro episodio la storia di Lino Timillero, di qualche settimana fa, del periodo in cui, a Montebello, c’era “el cinema a l’aperto”…

Β« … E se jera rivΓ  al ’54, come che go dito!!! L ano dopo saria stΓ  ano de Solenne de la Madona!! De Novenbre xe rivΓ  Don Francesco. Dopo on poco chel jera rivΓ , na matina el xe vegnΓΉ ale Scole Elementari. El gavea dimandΓ  de ndare par le classe dei tusiti de nove e diese ani, e, par ultima cuela dei tusi de la cuinta. El dimandava al Maestro de farghe cantare β€˜Fratelli d’Italia’, e el se metea a caminare inframeso ai banchi! El gavea on cuaderneto ndove cal scrivea calcossa. Dele volte, el fasea anca cantare β€˜Il Piave Mormorava’. Dopo el gΓ  parlΓ  on pochetin col Maestro, e, fate le so ciacole, el xe ndΓ  via. Co jera ora de nar casa, i Maestri ne ga dito, a zerti tusiti, che ale dΓ² de dopo magnΓ  i gavea da ndare al asilo dale Suore che Don Francesco el ne nsegnava a cantare par la Solenne..! No xe mancΓ nissun! CuΓ  salta fora naltra roba che xe bravi cuei che se ricorda!!! El Coro che jera tacΓ  par aria de drio al Altare Maggiore!! Cuei tusiti che ga cantΓ  la Messa par la Festa della Solenne del 1955 (mile novezento e zincuanta zincue ), xe stΓ  i ultimi a cantare sol Coro tacΓ  sΓΉ par aria!! SΓΉ dale Suore, Don Francesco el sonava l Armonio a pedali. Co jera caldo, el suava. Ma nialtri no vedivimo gnente de cuel chel fasea coi sΓ² piΓ© parche jera tuto cuerto da la so tonega!!!Par farne star chieti, vignea el Maestro Gobbo. El se sentava da na parte! Co na ociΓ  de traverso, no se movea nissun!!! Don Francesco ne nsegnava tuto on tochetin ala volta. Tri giorni ala setimana: Marti, Mercore e Zobia.Co ghe parea a lΓΉ che gavissimo nparΓ  mezzo Gloria, el ne lo fasea cantare tuto drio man!!! La Messa del Perosi! In Latin!!! El pΓ¬ difizile xe stΓ  el Credo!!! E ghemo fato le prove fin a Marso del 1955. A metΓ  Cuaresema, navimo a far le prove anca de sera, in Cesa. Do volte ala setimana. Se fasea le prove coi omini! SΓΉ, sol Coro! LΓ  par aria!!! Bepi Crosara jera l’Organista. E Doro Timinelo el doparava la mantesa che fasea aria par l Organo Par nar sol Coro se pasava de drio al Altar Magiore, se nava sΓΉ par le scale. RivΓ  in zima, se nava zΓ² tri scalini e ghe jera la mantesa co dΓΉ maneghi lunghi. On poco pΓ¬ vanti ghe jera naltra porta che la ndava ntel Coro. Zerte volte i omini i se spetava par far nare rento prima i Tenori. Dopo i Baritoni e dopo i Bassi! CiΓ²!!! No ghe jera mia tanto posto par moverse!!! Nialtri tusiti navimo rento cuando ca volivimo parchΓ© pasavimo dapartuto!! Jerimo metΓ  Soprani e metΓ  Contralti. A ne piasea a nar vedere Doro Timinelo tirar sΓΉ e zΓ² i maneghi dela mantesa!!! Lora, Don Fracesco, on Sabo, dopo che se jerimo confesΓ , el ne gΓ  ciamΓ , nialtri del Coro. El ne gΓ  portΓ  sΓΉ davanti ai maneghi dela mantesa. Pian pianelo el ne ga dito che Doro Timinelo, el fasea aria cola mantesa. L’aria la nava drento al Organo. Bepi Crosara tocava i tasti del Organo e se verzea na valvoleta par tasto. CussΓ¬ pasava l aria sΓΉ par le cane del Organo e vignea fora la Musica!!! Don Francesco el se metea in piΓ© de drio a Bepi Crosara par darne segno de cuando cantare. Fazile ?! Le cane del Organo le jera sconte da on cuadro grando. Co se jera in Cesa, nol parea gnanca vero chel podesse star sΓΉ lΓ  par aria!!! L Organo de stiani col Coro!!! Na maravejia! E na maravejia xe stΓ  ver vudo Don Francesco a nsegnarne a cantare! La Messa del Perosi! Me la recordo ncora desso!!! In Latin! A zincue voci!!!
E anca el Magnificat, parchΓ© navimo a cantare anca i Vesperi par lΓΉ, ala Domenega, dopo magnΓ !!! (cussΓ¬, co jerimo pΓ¬ grandi, se nava a gratis a vedare el Calcio). Β» (Linus DownUnder – Lino Timillero, Coniston 5-1-2019)

Foto:
1) L’interno della Chiesa Prepositurale nei primi anni ’50 del Novecento. Notare la presenza del coro ligneo a balconata dietro l’altare e la balaustra marmorea che separa la navata dal presbiterio, ora scomparsi (APUR – Archivio privato Umberto Ravagnani).

Umberto Ravagnani

Se hai FACEBOOK e l’articolo ti ha soddisfatto metti MI PIACEΒ 
Oppure lascia un commento qui sotto…

Un commento

  1. Giuliano Cederle
    Quel coro di voci bianche fu integrato nel coro della chiesa con i baritoni contralti e tenori. Sono diventato voce solista sostituendo Gigi Feltre pur non riuscendo a superare mai le sue qualitΓ  vocali.

Lascia un commento

Il tuo indirizzo email non sarΓ  pubblicato. I campi obbligatori sono contrassegnati *