CARO GESU BAMBINO

CARO GESÙ BAMBINO

Di LINO TIMILLERO – Coniston (AUSTRALIA)

Un click qui per ingrandire l'immagine

« Cuà in Australia, l’Epifania no la xe ‘Festa de Preceto’. Però, a mi, me xe vegnù a mente come ca jera le robe cuando ca jero on toseto, e spetavo senpre de vedare cossa ca me gavaria portà la Befana! Zugatoli, de sicuro, gnanca uno! Me popà el jera in Svissara, e el primo ano ch’el jera là, a Nadale, nol jera gnanca vegnù casa! Drento sol scalzaroto, tacà sora al fogolare, catavo on paro de mandarini, siè sete carobole, e on poche de stracaganasse. Dopo ‘ver spelà i mandarini, e dopo ‘verli magnà, magnavo anca le scorze. Sì, le scorze dei mandarini! Ma jero contento istesso!!! Zugavo co chialtri tusiti ca vignea a l’Asilo insieme, e luri i gavea sì i zugatoli: machinete, trenini, e parfin le pistole par zugare a Indiani e Cao-Boi!!!
‘Na volta, jero drio zugare co Zorzeto. El gavea Tre machinete, e jerimo drio zugare drento in te la cusina de casa sua, sora la tola da magnare. Se vede ca fasivimo massa bacan, cussì so mama la ne ga disesto de ‘nar fora!
Nialtri dù, vhrum – vhrum, no ghemo dito gnente. Fora jera fredo, ma zugando, chi sentia fredo? Mi però, ghe go dito a Zorzeto de tor sù on vaseto de vero sagomà bislungo e de color verde. Lù el me dimanda parchè, e mi ghe digo: “Te vedarè”! Fora, vizin a la strada, ghe jera on mureto chel gavea par sora dele piere una tacà l’altra, ca a nialtri dù el ne someiava on stradon ‘sfaltà, fato aposta par far le Mile –Milia! Zorzeto el me dise: “Lino, sa ghin femo del vaseto de vero?”. Mi ghe digo: “Gheto mai visto na Coriera zugatolo?” Lu el me dise: “Mi no, e ti?” “Varda, la femo suito.” Gò ciapà le tre machinete sue, le go messe in fila una drio che l’altra, dopo gò ciapà l’afareto bislungo fato de vero. Ghe lo gò messo sora le tre machinete, e xe vegnù fora la Coriera! Zorzeto el me gà vardà a boca verta, e dopo el me gà dito: “Prima tì”! Saria stà come chel gavesse dito: “Le machinete xe mie, ma la “Coriera” la xe prima par tì. “Vhrum-vhrum”, e chi sentia fredo!
Zorzeto el gavea anca on can. El se ciamava Reno! El gavea le ganbe curte, e col corea sbajandote drio, te podevi nare fin in piassa, prima chel te ciapasse! Parò, el jera on can bon! Co gavivimo le broze sui zanoci, o sui gunbi dei brazi, navimo vizin a lù, Reno, e lù el ne dava on par de lecà so le broze, e jerimo sicuri ca gavarissimo guario suito. L’inverno de l’ano prima, co jerimo a l’Asilo, on dì gavea scominzià a nevegare. Da la matina fin ca xe stà ora de nar casa, semo stà drento ‘ntel Cameron ndove ca se magnava. Suor Albina la jera drio diventar mata!!! La volea ca stissimo fermi e no la volea sentirne zigare! Pì che la disea de star chieti, e pì ca nialtri sbraitavimo!!! Co xe stà ora de nar casa, Suor Albina la jera so la porta. La fasea nar fora i tusiti e le tosete drio man ca la vedea calche dun ca vignea a turli. A mi cuela volta, xe vegnù torme me popà! El gavea sù el tabaro parché el jera drio nevegare bastansa forte. El me ga ciapà par man, alsando el tabaro da la man zanca, el me gà messo tacà a la so ganba. El me gà cuerto col tabaro, e, senpre tegnendome par man, el me gà dito: “Tiente tacà a la me man e camineme drio.” Lu el fasea on paso e mi me tocava farghene dù, zerte volte tri, de pasi! Jera tuto scuro, soto al tabaro. Podevo vedare i me pié, co le sgalmere, e i pié de me popà, ma lù el gavea i scarpuni co le broche sui tachi e anca so le sole. La neve la jera xa tanta ma me popà el caminava ndove ca i spazini del comune i gavea xa netà el marciapiè col trajon piccolo tirà a man. Par netar la strada, se dovea doparare on trajon pì grando, e bisognava chel fusse tirà da on tratore.
Cuando ca rivava la penultima domenega de Avento, el capelan, don Francesco, el ne disea a nialtri tusiti ca jera ora de scomiziare a catar sù el mus-cio par fare el Presepio. Alora se metivimo dacordo, in du tri ca ‘ndavimo a scola insieme, e se caminava fin sui taraji del Cianpo. Da la parte de drento, ‘ndove ca che jera el muro parchè co vignea xo tanta acua, no la portasse via el tarajo, là ghe jera tanto mus-cio! Inpienavimo on paro de zestei, e li portavimo in Ciesa, de fianco a l’altare dela S.Deposizione. El Presepio el vignea fato là ogni ano e ghe volea tanto mus-cio parché el jera on Presepio bastansa grandeto, no robete come i presepi de Zarmeghedo o de Montorso. La matina de l’Epifania, ghe jera i Re Magi, come ogni ano. Co jera finia la Messa, e el Prete el gavea dito: ‘Ite Missa est”, nialtri tusiti ‘ndavimo tuti a vedere el Presepio! Fofo, el sacrestan, el gavea messo sol Presepio i Re Magi co scomiziava la Messa prima. Un dei Re Magi, el jera `ncora sentà sol sò camelo! Al Bambino Gesù, i ghe portava: Oro, Incenso e Mirra!
Cuando ca mi jero xa in Australia da on puchi de ani, xe vignesta fora na bela canson rivà fresca dal’Italia, cantà dai tusiti, e me ricordo on poche de parole ‘ncora desso:

Caro Gesù Bambino, tu che sei tanto buono,
Lascia una volta il cielo
E vieni a giocare, a giocare con me.
Tu sai che il babbo è povero ed io non ho giocattoli…

Co la gò sentia la prima volta, me so sconto da na parte e me gò messo a pianzere ».
(Lino Timillero – Coniston 10-1-2016).

Umberto Ravagnani

Foto: Una delle moltissime rappresentazioni della nascita di Gesù nelle case di Montebello (APUR – Umberto Ravagnani).

 

La redazione del notiziario  AUREOS – AMICI DI MONTEBELLO  augura a tutti i lettori un

FELICE NATALE e un PROSPERO 2020

 

Se hai FACEBOOK e l’articolo ti ha soddisfatto metti MI PIACE 
Oppure lascia un commento qui sotto…

 

Lascia un commento

Il tuo indirizzo email non sarà pubblicato. I campi obbligatori sono contrassegnati *